لاہور کی اچھرا مارکیٹ میں توہینِ مذہب کی غلط فہمی کے سبب ہراساں ہونے والی خاتون کو مشتعل ہجوم سے بچا کر حفاظتی تحویل میں لینے والی اے ایس پی گلبرگ سیدہ شہر بانو نقوی کی بہادری نے سب کے دل جیت لیے۔

25 فروری کو لاہور کی اچھرہ مارکیٹ میں ایک خاتون کو عربی خطاطی کا لباس زیب تن کرنے کے باعث وہاں موجود لوگوں نے گھیرے میں لے لیا اور توہینِ مذہب کا الزام عائد کرتے ہوئے مشتعل ہوگئے۔

اچھرا مارکیٹ میں بگڑتی صورتِ حال کے درمیان  اے ایس پی گلبرگ سیدہ شہر بانو نقوی نے بروقت کاروائی کرتے ہوئے پہلے معاملےکا جائزہ لیا اور پھر اپنی عقلمندی سے مشتعل افراد کو اعتماد میں لیتے ہوئے خاتون کو بہ حفاظت اس مقام سے نکالنے میں کامیاب ہوگئیں۔

خیال رہے کہ خاتون کی قمیص پر عربی الفاظ پرنٹ تھے جس کے سبب مقامی لوگوں کو یہ گماں ہوا کہ خاتون نے قرآنی خطاطی والی قمیص پہن رکھی ہے لیکن بعدازاں علما نے اس بات کی تصدیق کی کہ قمیص پر قرآنی آیات نہیں لکھی ہوئیں۔

لاہور میں توہینِ مذہب کے الزام میں خاتون ہراسانی کا شکار

پاکستان کے شہر لاہور میں ایک خاتون کو مبینہ طور پر عربی خطاطی کے پرنٹ والی قمیص...

حقیقت سامنے آنے کے بعد سوشل میڈیا پر  اے ایس پی گلبرگ سیدہ شہر بانو نقوی کیلئے تعریف کا نہ رکنے والا سلسلہ شروع ہوگیا۔

سیدہ شہر بانو نقوی کی بہادری اور سمجھداری پر پنجاب پولیس کی جانب سے انہیں آئی جی پنجاب ڈاکٹر عثمان انور نے قائد اعظم پولیس میڈل دینے کا اعلان کردیا اور کہا قائداعظم پولیس میڈل کیلئے سفارشات حکومت پاکستان کوبھجوائی جائیں گی۔

علاوہ ازیں پاکستان مسلم لیگ نون کی چیف آرگنائزر مریم نواز نے بھی شہر بانو نقوی کی تعریف کرتے ہوئے ان کی دانائی اور بہادری کو سراہا۔