پاکستان سمیت دنیا کے کونے کونے میں بسے کئی پاکستانی مختلف شبہ ہائے زندگی میں اپنی بے مثال صلاحیتوں کا لوہا منوا کر ملک کا نام روشن کرنے کیلئے کوشاں ہیں، لیکن ایک پاکستانی نوجوان ایسا بھی ہے جس نے محض 8 سال میں ورلڈ ریکارڈز کی سینچری مکمل کرکے نہ صرف قوم کا سر فخر سے بلند کردیا بلکہ وہ یہ کارنامہ انجام دینے والا اکیلا پاکستانی ہے۔

جی ہاں خیبرپختونخوا کے ضلع جنوبی وزیرستان سے تعلق رکھنے والے عرفان محسود 100 گینز ورلڈ ریکارڈز بناکر پہلے پاکستانی بن گئے ہیں، انہوں نے عالمی ریکارڈز کی سینچری 8 سال کے کم عرصے میں مکمل کرلی۔

عرفان محسود نے اٹلی کے مارسیلو فیری کا ریکارڈ توڑ کر گنیز ورلڈ ریکارڈز کی سنچری مکمل کی، اٹلی کے مارسیلو نے پاؤں کی انگلی سے 56 کلو وزن اٹھا کر عالمی ریکارڈ قائم کیا تھا جو عرفان محسود نے توڑ دیا۔ 

پاکستانی ریکارڈ میکر نے پاؤں کی انگلی سے 63 کلو وزن اٹھا کر عالمی ریکارڈ قائم کردیا۔

عرفان محسود پش اپس کیٹیگری میں ورلڈ لیول پر سب زیادہ 46 ریکارڈز بنا چکے ہیں۔ عرفان محسود نے 100 پاؤنڈ وزن کے ساتھ 31 ریکارڈز بنائے ہیں۔

 انہوں نے اب تک 100 پاؤنڈ، 80 پاؤنڈ، 60 پاؤنڈ اور 40 پاؤنڈ وزن کے ساتھ سب سے زائد ورلڈ ریکارڈ قائم کیے۔

مارشل پش اپس، جمپنگ جیکس، اسٹیپ اپس، نی اور ایلبو اسٹرائکس، ہائی اور اسٹار جمپس کے ورلڈ ریکارڈز بھی قائم کیے۔ عرفان محسود نے اب تک 16 ممالک کے ورلڈ ریکارڈز توڑے ہیں جن میں امریکا، برطانیہ، بھارت، چین، ناروے، جرمنی، فرانس، فن لینڈ، فلپائن، اسپین، اٹلی، لبنان، مصر و دیگر ممالک کے کھلاڑیوں کے ریکارڈز شامل ہیں۔

صرف عرفان محسود ہی نہیں ان کے 16 شاگرد شاگر بھی گینز ورلڈ ریکارڈز بنا چکے ہیں۔ دنیا بھر میں ملک کا نام روشن کرنے والے عرفان محسود کو 2023 میں صدارتی ایوارڈ برائے حسن کارگردگی سے نوازا گیا تھا۔