بالی وڈ سُپر اسٹار اور منا بھائی کے نام سے پہچان بنانے والے سنجے دت کی ایک تصویر سوشل میڈیا پر خوب وائرل ہورہی ہے جس میں وہ ایک شخص سے پُرتپاک انداز میں مل رہے ہیں۔

سوشل میڈیا پر دعویٰ کیا جارہا ہے کہ سنجے دت سے ہاتھ ملانے والا شخص کوئی اور نہیں بلکہ موجودہ پاکستانی صدر آصف علی زرداری ہیں۔

سوشل میڈیا سائٹ ایکس پر وائرل ایک پوسٹ میں دعویٰ کیا گیا کہ ’آصف علی زرداری کی سنجے دت سے ملاقات کی یہ تصویر 1996 کی ہے کہ جب سنجے دت نے پاکستان کا دورہ کیا تھا۔‘

بظاہر تو اس تصویر میں موجود شخص پہلی نظر میں آصف علی زرداری ہی لگ رہے ہیں لیکن حقیقت اس کے برعکس ہے۔

اس تصویر میں موجود شخص آصف علی زرداری نہیں بلکہ بھارتی اداکار سنجے نارویکر ہیں، انہوں نے سال 2021 میں اپنی سوشل میڈیا پر انٹری کا اعلان اس تصویر کیساتھ کیا تھا۔

انہوں نے اپنی پوسٹ میں کہا تھا کہ ’مجھے یہ اعلان کرتے ہوئے خوشی ہو رہی ہے کہ آخرکار میں اپنے مداحوں اور دوستوں کی بہت سی درخواستوں کے بعد سوشل میڈیا پر آگیا ہوں، میں یہاں آپ سب کے ساتھ جڑے رہنے کے لیے ہوں۔‘

سنجے دت اور مادھوری کی ناکام محبت کی وجہ؟

مادھوری سے پہلی ملاقات کے وقت سنجے دت شادی شدہ تھے

اسی پوسٹ میں اداکار نے اس تصویر کو شئیر کرتے ہوئے بتایا تھا کہ مجھے امید ہے کہ آپ اس نئے سوشل میڈیا ایڈونچر میں میرا ساتھ دیں گے، اس پہلی پوسٹ میں سنجے دت کے ساتھ اپنی پہلی ملاقات کی تصویریں شیئر کر رہا ہوں جب فلم واستو کے سیٹ پر ’سنجے نے سنجے‘ سے ملاقات کی تھی۔

خیال رہے کہ فلم واستو 1999 کی ایکشن ، کرائم فلم ہے، مہیش منجریکر کی ہدایت کاری میں بننے والی یہ فلم اکتوبر 1999 میں ریلیز ہوئی ، اس فلم میں سنجے دت کے ہمراہ پریش راول،  نمرتا شیروڈ نے جاندار اداکاری کے جوہر دکھائے تھے۔

سنجے دت کے فلمی کیرئیرمیں فلم واستو انتہائی اہمیت کی حامل فلم ہے اس فلم میں سنجے دت رگھو بھائی کے کردار میں سب کے دلوں میں نقش ہیں۔