وفاقی حکومت نے بانی تحریک انصاف (پی ٹی آئی) عمران خان کے اڈیالہ جیل میں کمرے کی تصاویر سپریم کورٹ میں پیش کر دیں۔

میڈیا رپورٹس کے مطابق حکومت نے عمران خان کے وکلا تک رسائی نہ دینے کے بیان کی تردید کرتے ہوئے سپریم کورٹ میں اضافی دستاویزات جمع کروا دیں۔

ان دستاویزات کے ساتھ عمران خان کی اڈیالہ جیل میں اہل خانہ اور وکلا سے ملاقاتوں کی فہرست بھی شامل ہے۔

وفاقی حکومت کا کہنا ہے کہ عمران خان کا قید تنہائی میں ہونے کا مؤقف بھی غلط ہے، ان سے ملاقات کرنے والوں کی فہرست بھی سپریم کورٹ میں جمع کروادی گئی ہے۔

حکومتی رپورٹ کے مطابق عمران خان نے سپریم کورٹ میں وکلا تک رسائی نہ دینے کا موقف اپنایا، عدالت مناسب سمجھے تو ان کے بیان کی حقیقت جانچنے کے لیے کمیشن بھی مقرر کرسکتی ہے۔

رپورٹ کے مطابق عمران خان کو جیل میں کتابیں، ایئر کولر، ٹی وی اور ورزش کا سامان سمیت تمام ضروری سہولیات فراہم کی گئیں ہیں۔

حکومت کی جانب سے عدالت میں جمع کروائی رپورٹ سے منسلک تصاویر میں دیکھا جاسکتا ہےکہ عمران خان کے کمرے میں ایئر کولر، ایل ای ڈی، اسٹڈی ٹیبل، کرسی اور میٹریس کی سہولت موجود ہے جبکہ انہیں ورزش کی مشین بھی فراہم کی گئی ہے۔

عمران خان کے سیل کے باہر ایک راہداری ہے جہاں انہیں دن میں 2 مرتبہ چہل قدمی کرنے کی سہولت میسر ہے۔

اُن کے سیل میں ایک علیحدہ کچن بھی موجود ہے، علاوہ ازیں اُنہیں ڈرائے فروٹس، چنے، بادام، کولڈ ڈرنکس اور چاکلیٹس بھی دستیاب ہیں۔

رپورٹ کے مطابق جیل میں عمران خان کے لیے ان کی پسند کے مطابق کھانا بنایا جاتا ہے، علاوہ ازیں رپورٹ میں عمران خان سے ستمبر 2023 سے 26 مئی 2024 تک ملاقاتیں کرنے والوں کے نام بھی درج ہیں۔