پاکستانی اداکار دانش تیمور کے نئے ڈرامے 'تیری چھاؤں میں' کی پہلی قسط دیکھ کر ناظرین کو بالی وڈ فلم 'تیرے نام' کا آئیکونک سین یاد آگیا۔

ان دنوں دانش تیمور ڈرامہ 'تیری چھاؤں میں' اپنی اداکاری کے جوہر دکھاتے نظر آرہے ہیں جس میں ان کے مدِ مقابل سوشل میڈیا انفلوئنسر و اداکارہ لائبہ خرم کو کاسٹ کیا گیا ہے۔

دانش تیمور اور لائبہ خرم کی جوڑی پر سوال اٹھ گئے

دانش تیمور کا کم عمر لڑکی کے ساتھ ڈراما تنقید کی زد میں

ڈرامے کی پہلی قسط میں دانش تیمور بطور سالار یونیورسٹی کی طالبہ کا کردار 'ودیمہ مظفر' نبھانے والی لائبہ کو پہلی نظر دیکھ کر ان کی محبت میں گرفتار ہو جاتے ہیں۔

اسی قسط میں یونیورسٹی کے اندر تقریری مقابلہ دکھایا گیا جس میں ودیمہ نے بھی حصہ لیا اور ان کے محبت میں گرفتار سالار ان کو دیکھنے آڈیٹوریم میں جا بیٹھے۔

ڈرامے کا یہ سین دیکھ کر ناظرین کو بالی وڈ فلم 'تیرے نام' کا آئیکونک سین یاد آگیا جس میں سلمان خان بطور 'رادھے' فلم کی ہیروئن 'نرچرا' کی محبت میں گرفتار ہوکر ان کی تقریر سننے آڈیٹوریم میں بیٹھے نظر آتے ہیں اور تقریر سے بور ہو کر تمام لوگ آڈیٹوریم سے چلے جاتے ہیں لیکن رادھے ہر بات سے بےخبر بس نرچرا کو سننے میں مصروف تھے اور آخر میں انکے لیے تالیاں بھی بجاتے ہیں۔

سوشل میڈیا پر دانش تیمور کے ڈرامے اور تیرے نام کے سینز کو جوڑ کر لگایا جا رہا ہے اور اسے ایک بڑی نقل قرار دیا جا رہا ہے۔

اس نقل پر جہاں سوشل میڈیا صارفین مختلف تبصرےکرتے دکھے وہیں پاکستانی اداکار و ہدایتکار یاسر حسین نے بھی اس سین کو اپنی انسٹاگرام اسٹوری پر شیئر کرتے ہوئے لکھا کہ ' ہدایتکار کون ہے بھائی؟ کیا چل کیا رہا ہے؟'

انسٹاگرام پر ایک صارف نے لکھا کہ 'آج کل تو سب ہی کاپی چل رہا ہے'، جبکہ دانش تیمور کے ایک مداح نے لکھا کہ 'ہاں دانش تیمور پاکستان کے سلمان خان ہیں'۔

سوشل میڈیا صارفین کی ایک بڑی تعداد اس نقل پر کچھ لکھنے کے بجائے صرف ہنسنے والے ایموجیز بناتے بھی نظر آرہے ہیں۔