اسلام آباد اور کراچی میں امریکی ویزا دفاتر ماہانہ 10 ہزار سے زائد درخواستوں پر کام کر رہے ہیں جبکہ اپوائٹمنٹ ویٹنگ کا وقت بھی گزشتہ سال کے مقابلے میں تقریباً آدھا کردیا گیا ہے۔

راحت فتح علی خان کا امریکی ویزا مسترد

ایمبیسی نے ٹیکس دستاویزات کا مطالبہ کردیا

ڈان اخبار کی رپورٹ کے مطابق امریکی سفارت خانے کے ایک سینئر عہدیدار نے میڈیا سے گفتگو کرتے ہوئے بتایا کہ اسلام آباد اور کراچی کے دفاتر سے جاری کیے گئے ویزوں کی تعداد 2023 میں بلند ترین سطح پر پہنچ گئی تھی۔

انہوں نے کہا کہ اکتوبر 2024 میں ختم ہونے والے رواں امریکی مالی سال میں جاری کردہ ویزوں کی تعداد اِس سے بھی بڑھ جائے گی۔

عہدیدار نے ستمبر 2023 میں بحران جیسی صورتحال کا حوالہ دیا جب اپوائنٹمنٹ ویٹنگ کا وقت 440 دن تک پہنچ گیا تھا۔

پاکستانیوں کیلئے سعودی عرب کا سفر کرنا مزید آسان ہوگیا

مملکت نے وزٹ ویزے کی شرائط میں نرمی کردی۔

انہوں نے مزید کہا کہ سفارت خانے کی جانب سے متعدد اقدامات کے بعد اب اپوائنٹمنٹ ویٹنگ کا وقت کم کر کے 237 روز تک آگیا ہے۔

ان کا کہنا تھا کہ اگر متعلقہ افسر مطمئن ہو جائے تو انٹرویو کے بعد 5 روز کے اندر ویزا جاری کر دیا جاتا ہے۔

عہدیدار نے کہا کہ ویزا درخواستیں پروسس کرنے کے وقت میں تاخیر کی وجہ یہ ہے کہ ہر درخواست کو انفرادی طور پر جانچا اور پرکھا جاتا ہے اور اس کا آزادانہ جائزہ لیا جاتا ہے۔

پاکستانیوں کو یورپی ویزا کیسے مل سکتا ہے؟

اخراجات کی تمام تر تفصیلات سامنے آگئیں

امریکی حکومت کی ویب سائٹ پر دستیاب اعداد و شمار ظاہر کرتے ہیں کہ اکتوبر 2023 میں ختم ہونے والے مالی سال کے دوران پاکستان سے مجموعی طور پر ایک لاکھ 7 ہزار 183 نان امیگریشن ویزے جاری کیے گئے جبکہ گزشتہ مالی سال میں 72 ہزار 82 ویزے جاری کیے گئے تھے۔

عہدیدار نے کہا کہ درخواست گزاروں کی زیادہ تعداد کی وجہ سے گزشتہ برس اب تک کے سب سے زیادہ ویزے جاری کیے گئے اور 2024 میں اس تعداد میں مزید اضافہ متوقع ہے۔

عہدیدار نے بتایا کہ امریکی ویزا سیکشن طلبا کی جانب سے موصول ہونے والی ویزا درخواستوں کو ترجیح دیتا ہے۔

اب کینیڈا کا ویزا با آسانی کیسے حاصل کیا جائے؟

کینیڈا کے ورک پرمٹ کے قانون میں نئ تبدیلی

امریکی عہدیدار نے ویزا درخواست مسترد ہونے کی شرح اور اسلام آباد اور کراچی میں ویزا سیکشن میں موصول ہونے والی درخواستوں کی مجموعی تعداد کے بارے میں صحافیوں کو بتانے سے انکار کر دیا کیونکہ اس طرح کا ڈیٹا پبلک نہیں کیا گیا۔

گزشتہ سال ستمبر میں امریکی ویزوں کی سب سے زیادہ مانگ کی وجہ سے کراچی قونصل خانے میں مشکلات درپیش ہونے کے بعد سفارت خانے نے متعدد اقدامات کا اعلان کیا اور دونوں مراکز میں ویزا پروسیسنگ کی استعدادکار میں اضافہ کرلیا۔