گزشتہ ایک برس کے دوران صرف کراچی میں تقریباً 15,000 خواتین کے  اپنے شریک حیات سے خلع یا طلاق حاصل کرنے کے لیے عدالتوں سے رجوع کرنے کا انکشاف سامنے آیا ہے۔

جن کی پریشان کن ازدواجی زندگی کے پیچھے مالی عدم استحکام سب سے بڑی وجہ بن کر سامنے آئی۔

اسلامی شریعت میں نکاح کو ختم کرنے کے جو طریقے ہیں ان میں ایک طریقہ خلع بھی ہے،اگرعورت شوہرکے ساتھ رہنے پرراضی نہیں ہے اورشوہراسے طلاق بھی نہیں دیتا تو اسے اختیار ہے کہ اپناحق مہر واپس کرکے یاکچھ مال بطور فدیہ دے کر شوہرکو رضامند کرکے خلع حاصل کرلے۔

طلاق کے ذہنی صحت پر اثرات سے چھٹکارا کیسے ممکن؟

طلاق ذہنی صحت پر نمایاں اثرات مرتب کرتی ہے، نفسیاتی ماہرین

یہ تازہ اعداد و شمار جامعہ کراچی میں ایک مباحثے کے دوران سامنے آئے جہاں مذہبی اسکالرز، ماہرین قانون اور سوشل سائنٹسٹ طلاق یافتہ اور بیوہ خواتین کی دوسری شادی کے موضوع پر بات کرنے کے لیے جمع ہوئے۔

انہوں نے ان مردوں اور عورتوں کے لیے دوسری شادی کی حوصلہ افزائی کی اہمیت پر زور دیا جو یا تو طلاق یافتہ ہیں یا بیوہ ہیں۔

مباحثے میں ایڈووکیٹ روبینہ جتوئی نے نشاندہی کی کہ خواتین کی بڑھتی ہوئی تعداد خلع اور دوسری شادیوں پر غور کر رہی ہے۔

انہوں نے انکشاف کیا کہ گزشتہ سال صرف کراچی میں 14,973 خواتین نے خلع کے لیے درخواستیں جمع کروائیں، جن میں سے بہت سی طلاقوں کی بنیادی وجہ مالی عدم استحکام بتائی گئی۔

زید علی پاکستان میں طلاق کی بڑھتی شرح سے شدید مایوس

ہم ایک ایسے دور میں جی رہے ہیں جہاں شادی ایک مذاق بن گئی ہے

مفتی فضل سبحانی نے روشنی ڈالی کہ اسلام میں طلاق جائز ہے لیکن یہ سب سے کم پسندیدہ آپشن ہے۔

انہوں نے معاشرے پر زور دیا کہ سب کو یہ سمجھنا چاہیے کہ مطلقہ یا بیوہ عورت کی دوسری شادی کوئی بدنما چیز نہیں ہے اوع حضور اکرم صلی اللہ علیہ وسلم کی مثال کا حوالہ دیا کہ آپ کی اکثر ازواج یا تو بیوہ تھیں یا طلاق یافتہ۔

فنکار ایاز خان نے جدید ٹی وی ڈراموں میں خواتین اور شادیوں کی تصویر کشی پر تنقید کرتے ہوئے دعویٰ کیا کہ یہ منفی سماجی رویوں میں معاون ہیں، انہوں نے ایسے مواد پر زور دیا جو میاں بیوی کے درمیان صحت مند تعلقات اور باہمی احترام کو فروغ دے۔

پروفیسر ڈاکٹر شائستہ تبسم نے طلاق یافتہ خواتین کو درپیش معاشرتی چیلنجوں پر گفتگو کی، جو اکثر بیواؤں کو درپیش چیلنجز سے زیادہ شدید ہوتے ہیں۔

سکینہ سمو کا طلاق یافتہ خواتین کو دوسری شادی نہ کرنے کا مشورہ

بچوں کا مستقبل برباد کرنا ہے تو دوسری شادی شوق سے کریں

ڈاکٹر فرحانہ علیم نے اس بات پر زور دیا کہ میڈیا کو ان سماجی مسائل کو حل کرنے کے لیے زیادہ تعمیری کردار ادا کرنا چاہیے، کیونکہ اس کا عوامی تاثرات پر بڑا اثر ہے۔

ایڈووکیٹ ضیا اعوان نے شادیوں میں خاندانی مداخلت کو کم کرنے کی اہمیت پر زور دیا، جو اکثر طلاق کا باعث بنتا ہے، انہوں نے گھریلو تشدد کے قوانین کے بہتر نفاذ پر زور دیتے ہوئے کہا کہ اس سے بہت سی علیحدگیوں کو روکا جا سکتا ہے۔