فلم / ٹی وی

جیا اور امیتابھ کے سنہری دور کی یادگار فلمیں کونسی؟

یہ جوڑی ہمیشہ سے ہی مداحوں میں مقبول رہی ہے

Web Desk

one year ago

جیا اور امیتابھ کے سنہری دور کی یادگار فلمیں کونسی؟

یہ جوڑی ہمیشہ سے ہی مداحوں میں مقبول رہی ہے

بالی وڈ فلم نگری کے لیجنڈ اداکار امیتابھ بچن اور جیا بچن کی جوڑی وہ واحد جوڑی ہے جو نہ صرف شوبز میں مقبول ہے بلکہ ذاتی اور پیشہ ورانہ لحاظ سے انکا رکھ رکھاؤ فینز کیلئے بھی ایک مثال ہے۔

امیتابھ بچن اپنے کرئیر کی 5 دہائیاں دیکھنے کے بعد آج بھی سپراسٹار مانے جاتے ہیں، ان کی توانائی آج بھی 70 کی دہائی کی طرح برقرار ہے جو ان کی فلموں اور ٹی وی شوز میں نظر آتی رہتی ہے۔

اگرچہ کہ امیتابھ بچن نے اپنے کرئیر کے آغاز میں ناکامیوں کا منہ دیکھا، کئی فلاپ فلمیں دیں لیکن اس کے بعد وہ فلموں کے بادشاہ بن گئے، کیونکہ امیتابھ بچن نے بالی وڈ میں ایکشن فلموں کی ایک قسم کو روشناس کروایا اور ہندوستانی سنیما کے عظیم ترین اداکاروں میں سے ایک بن گئے۔

70 کی دہائی میں ’اینگری ینگ مین‘ کے روپ میں ان کی پہچان بنی اور آج بھی وہ ہر فلم میں اپنی شاندار پرفارمنس سے مداحوں کو متاثر کررہے ہیں۔

سنجیدہ کردار ہویا کامیڈی، رومانٹک کردار ہویا ایکشن سے بھرپور امیتابھ کی مقبولیت میں کمی نہیں آئی۔ ان کی فلموں میں ہر ایک کردار اور ہر پرفارمنس میں عالمی معیار نظر آتا ہے، جو انہیں بھارتی فلم انڈسٹری کے بہترین اداکاروں میں شمار کراتا ہے۔

لیکن اگر انکی ازدواجی زندگی کی بات کریں تو جیا بچن کیساتھ بھی انکا انداز مداحوں کو خوب چچتا ہے۔ ازدواجی زندگی کو اعتدال سے چلنے سے لے کر فلمی دنیا میں فنی صلاحیتوں تک یہ جوڑی ہر دور میں مداحوں کی اولین پسند رہی ہے۔

تو آئیے بات کرتے ہیں ڈرامہ، رومانس، اور کامیڈی کے خوبصورت امتزاج سے بھرپور لیجنڈری اداکاروں کی ان ناقابلِ فراموش فلموں کی جو آج تک مداح بھلائے نہ بھول سکے۔

زنجیر:

سال 1973 میں سینما گھروں کی زینت بننے والی فلم زنجیر کو بھلا کون بھول سکتا ہے؟ ایکشن اور جرائم پر مبنی اس فلم میں امیتابھ بچن، جیا بچن کی جوڑی کو فلمی شائقین کی جانب سے بے حد پسند کیا گیا۔

اور یہ کہنا بھی غلط نہ ہوگا کہ یہ فلم امیتابھ بچن کے کرئیر کے لیے ایک سنگ میل ثابت ہوئی، جس نے انہیں بالی وڈ کا ’غصے والا نوجوان‘ بنایا۔

اس کرائم فلم کی کہانی ایک ایماندار انسپکٹر کے گرد گھومتی ہے جو اپنے والدین کی موت کا بدلہ لینا چاہتا ہے۔ یہ فلم مختلف جرائم پیشہ لوگوں اور بد کردار افراد سے بھری ہوئی ہے اور یہ دکھاتی ہے کہ پولیس کو بعض اوقات مجرموں سے بھی دوستی کرنی پڑتی ہے تاکہ انہیں معلومات حاصل ہو سکے۔

اس فلم میں امیتابھ بچن نے انسپکٹر وجے کھنہ کا کردار ادا کیا جبکہ جیا مالا کے کردار میں نظر آئیں جو ایک بےفکر اسٹریٹ پرفارمر ہیں، جن کی زندگی اس وقت بدل جاتی ہے جب وہ ایک قتل کی گواہ بنتی ہیں اور وجے کی حفاظت میں آ جاتی ہیں۔

یہ بھی پڑھیں:پہاڑوں سے محبت پر مجبور کردینے والی 5 نیٹ فلیکس فلمیں

فلم کی سنجیدہ کہانی، وجے کی شدت اور مالا کی معصومیت جیسے متضاد کرداروں کے ساتھ مل کر ایک دلچسپ تعلق پیش کرتی ہے۔ یہ تاریخی فلم نہ صرف امیتابھ کو سپر اسٹارڈم پر لے گئی بلکہ انہیں اور جیا کو ایک محبوب اسکرین جوڑی کے طور پر بھی مضبوط کیا۔

یاد رہے کہ حقیقی زندگی میں بھی امیتابھ بچن اور جیا کے درمیان محبت اسی فلم کے سیٹ پر پروان چڑھی اور جلد ہی ان دونوں کی شادی ہوگئی۔

ابھیمان:

امیتابھ بچن کے کرئیر میں ایک اور فلم ’ابھیمان’ کی بات کریں توکروڑوں دلوں پر راج کرنے والے بالی وڈ اداکار امیتابھ بچن اوران کی اہلیہ اداکارہ جیا بچن کی فلم ’ابھیمان‘ کو بنے تو 50 برس ہو چکے مگر اس مشہور جوڑی کی منفرد اور مشکل موضوع کا احاطہ کرنے والی یہ فلم لوگوں کو آج بھی بہت متاثر کرتی ہے۔

ابھیمان کی ایک بہت خاص بات یہ ہے کہ فلم میں میاں بیوی کا مرکزی کردار نبھانے والے امیتابھ بچن اور جیا حقیقی زندگی میں بھی ان ہی دنوں بالکل نئے نئے شادی کے بندھن میں بندھے تھے جب اس فلم کو نمائش کے لیے پیش کیا گیا۔

سنہ 1973 میں ریلیز ہونے والی یہ فلم اُن کی شادی کے صرف ایک ماہ بعد ریلیز ہوئی تھی۔

فلم میں اداکارامیتابھ بچن نے ایک ایسے مشہور نوجوان گلوکار کا کردار ادا کیا جو اپنی نئی نویلی بیوی کو اسٹیج پر پرفارم کرنے کے لیے راضی کرتا ہے لیکن جب وہ شہرت میں اپنے شوہر کو پیچھے چھوڑ دیتی ہے تو اُس کی انا کو ٹھیس پہنچتی ہے اور حسد غالب آ جاتا ہے۔

تاہم کہانی میں آگے چل کر جیسے جیسے ان کے تعلقات خراب ہوتے ہیں، فلم حسد، محبت اور مصالحت جیسے موضوعات کو مزید خوبصورتی سے بیان کرتی نظر آئی۔

دیکھا جائے تو جیا کا اُما کا کردار، ایک نرم لیکن پرعزم عورت کا تھا جو اپنے شوہر کی عدم تحفظات سے نمٹ رہی ہے جو ہر دیکھنے والوں کو بےحد متاثر کن لگا۔

ملی:

1975 میں ریلیز ہونے والی فلم ’ملی’ بھی امیتابھ کے کرئیر میں اہم سنگ میل کی حیثیت رکھتی ہے۔

اس فلم میں امیتابھ بچن اور جیا بچن مرکزی کردار میں نظر آئے، جیا بچن نے ملی کا کردار نبھایا جو جواں اور زندہ دل لڑکی ہے لیکن ایک مہلک بیماری میں مبتلا ہے۔

دوسری جانب امیتابھ بچن نے شیکھر کا کردار نبھایا، جو ایک تنہا اور شرابی شخص ہے، لیکن ملی کے ساتھ تعلق کے ذریعے امید اور زندگی کا نیا مقصد پاتا ہے۔

فلم ملی اور شیکھر کے رومانوی تعلق پر مبنی ہے جنکا تعلق المیے کے سائے کے باوجود پروان چڑھتا ہے۔ جیا کی شاندار اور پرجوش اداکاری اور امیتابھ بچن کی سنجیدہ لیکن جذبات سے بھری پرفارمنس نے ایک دل کو چھونے والی کہانی تخلیق کی، جو محبت، ثابت قدمی اور رشتوں کی زندگی بدل دینے والی طاقت کو اجاگر کرتی ہے۔

چپکے چپکے:

1975 میں سینما گھروں کی زینت بننے والی فلم ’چپکے چپکے’ ایک کلاسک کامیڈی فلم ہے جو امیتابھ بچن اور جیا بچن کے مزاحیہ پہلو کو اجاگر کرتی ہے۔

اس فلم میں امیتابھ بچن اور جیا بچن نئی نویلی شادی شدہ جوڑے کے کردار نظر آئے جن میں رومانس ، مزاح اور محبت بھرے ڈائیلاگز صارفین کےدل چھو گئے۔

فلم میں امیتابھ بچن نے ایک ذہین پروفیسر کا کردار نبھایا جو بے ساختہ مزاح تھا جبکہ جیا کا ایک شوخ بیوی کے طور پر دلکش کردار اس فلم کے دلکشی میں اضافہ کرگیا۔

سلسلہ:

امیتابھ بچن کی فلم ’سلسلہ’ بھی ناقابل فراموش فلم ہے۔یہ ایک ایسی فلم تھی جس میں شادی کے بعد محبت کے بارے میں ایک سچائی کو بڑے بے باک انداز میں پیش کیا گیا۔

اس فلم میں امیتابھ بچن اور جیا بچن کے علاوہ ریکھا بھی تھیں، اور اس فلم میں ان کا رشتہ حقیقتاً بہت قریب تھا، جس نے ناظرین کو جھنجھوڑ کر رکھ دیا۔

اگرچہ فلم ابتدائی طور پر کامیاب نہیں رہی تھی، مگر وقت کے ساتھ اس نے ایک کلٹ حیثیت اختیار کر لی۔ اس فلم کے گانے جیسے ’نیلا آسمان‘، ’یہ کہاں آگئے ہم‘ اور ’دیکھا ایک خواب‘ نے فلم کو ایک شاعرانہ رنگ دیا۔

اور یہ کہا جائے تو غلط نہ ہوگا کہ امیتابھ بچن اور جیا بچن کی فلمیں، کہانی، اداکاری اور جذباتی اثرات کے باعث لازوال کلاسک بن چکی ہیں۔ ان کی جوڑی سنیما کی تاریخ میں ایک نمایاں مقام رکھتی ہے اور آنے والے فلمسازوں اور شائقین کے لیے تحریک کا باعث بنی ہوئی ہے۔