آئی سی سی چیمپئنز ٹرافی کے لیے لاہور کے اپ گریڈ ہونے والے قذافی سٹیڈیم کا افتتاح کر دیا گیا جبکہ اس موقع پر پاکستانی ٹیم کی نئی جرسی بھی لانچ کردی گئی۔

میڈیا رپورٹس کے مطابق قذافی سٹیڈیم کا افتتاح وزیراعظم پاکستان میاں محمد شہباز شریف نے کیا۔

افتتاحی تقریب میں وزیراعظم محمد شہباز شریف کے ساتھ صوبہ پنجاب کی وزیراعلیٰ مریم نواز شریف اور چیئرمین پاکستان کرکٹ بورڈ (پی سی بی) محسن نقوی بھی شامل تھے۔

تقریب میں پاکستان کرکٹ ٹیم کے ساتھ ساتھ وفاقی وزراء اور دیگر حکومتی عہدیدار بھی موجود تھے۔

قذافی سٹیڈیم کو 117 دنوں میں آئی سی سی چیمپئنز ٹرافی کے لیے اپ گریڈ کیا گیا ہے۔

'آج ہم سب کے لیے بڑی خوشی کا دن ہے'

افتتاحی تقریب سے خطاب کرتے ہوئے وزیراعظم محمد شہباز شریف نے کہا کہ ’آج ہم سب کے لیے بڑی خوشی کا دن ہے کہ قذافی سٹیڈیم کی تعمیر نو بہت ہی شاندار طریقے سے مکمل ہوئی‘۔

وزیراعظم محمد شہباز شریف نے مزید کہا کہ ’محسن نقوی صاحب کی سپرویژن میں 117 دنوں میں جو ناممکن کام تھا وہ ممکن کر دکھایا۔ میں سب کو خراج تحسین پیش کرتا ہوں‘۔

قذافی اسٹیڈیم میں مزدوروں کو خراج تحسین کیلئے چیئرمین PCB کا منفرد انداز

آپ نے قذافی اسٹیڈیم میں ہمارے ساتھ بیٹھ کر میچ دیکھنا ہے، محسن نقوی

انہوں نے پاکستانی ٹیم سے بات کرتے ہوئے کہا کہ ’چیمپئنز ٹرافی آپ کی منتظر ہے۔ اللہ تعالیٰ آپ کی مدد کریں گے۔ آپ پوری قوم کے ہیروز ہوں گے۔ آپ 24 کروڑ عوام کے دل جیتیں گے۔ ہم سب آپ کے لیے دعا گو ہیں‘۔

شہباز شریف نے کپتان محمد رضوان اور بابر اعظم سے مخاطب ہوتے ہوئے کہا کہ ’آپ سے بہت توقع ہے‘۔

انہوں نے مزاحیہ انداز میں شاہین شاہ آفریدی سے اپنے سسر شاہد آفریدی کے نقشِ قدم پر چلنے کی تاکید بھی کی۔

وزیراعظم نے قومی ٹیم سے مخاطب ہوتے ہوئے کہا کہ 'آپ ہمسایہ ملک (بھارت) کو شکست دے کر 24 کروڑ عوام کا دل جیتیں گے، دعا گو ہیں کہ ہماری ٹیم بھارت کو شکست فاش دے'۔

نئی جرسی لانچ

اس تقریب میں آئی سی سی چیمپئنز ٹرافی کے لیے پاکستانی ٹیم کی نئی جرسی بھی لانچ کی گئی۔

پاکستانی ٹیم کے کھلاڑی قذافی سٹیڈیم کے سٹیج پر کپتان محمد رضوان کی قیادت میں جمع ہوئے جہاں انہوں نے نئی جرسی کی نمائش کروائی۔

پاکستانی ٹیم کی نئی جرسی ہلکے سبز رنگ کی تھیم پر بنائی گئی ہے جس میں گہری سبز دھاریں بنی ہوئی ہیں۔

ٹیم کی جرسی کے درمیان میں ’پاکستان‘ لکھا گیا ہے جبکہ جرسی کے ایک جانب چیمپئنز ٹرافی اور دوسری جانب ٹیم کا لوگو بنا ہوا ہے، علاوہ ازیں اس نئی کٹ میں گہرے سبز رنگ کا ٹراؤزر بھی شامل ہے۔

چیمپئنز ٹرافی 2025ء

واضح رہے کہ منی ورلڈکپ کے نام سے مشہور آئی سی سی چیمپئنز ٹرافی 2025 کا آغاز 19 فروری سے پاکستان میں ہو رہا ہے۔

عاطف اسلم کی آواز میں چیمپئنز ٹرافی کا آفیشل ترانہ ریلیز ہوتے ہی مقبول

آفیشل ترانے میں عاطف اسلم نے اپنی آواز کا جادو جگانے کے ساتھ ساتھ پرفارم بھی کیا...

آئی سی سی ون ڈے ورلڈکپ 1996 اور 2008 کے ایشیا کپ کے بعد پاکستان کو ایک عرصے بعد پہلی بار چیمپئنز ٹرافی 2025 کی صورت میں آئی سی سی کے کسی بڑے ایونٹ کی میزبانی ملی ہے، جس کے تمام میچز اگلے سال 19 فروری سے 19 مارچ تک پاکستان کے تین بڑے شہروں کراچی، لاہور اور راولپنڈی میں کھیلے جائیں گے۔

بھارت کی جانب سے ٹیم پاکستان بھیجنے سے انکار کے بعد پاکستان نے آئی سی سی کے ساتھ ایک معاہدے کے تحت ہائبرڈ ماڈل پر رضامندی ظاہر کی تھی، جس کے تحت پاکستان اور بھارت کے درمیان 2027 تک تمام انٹرنیشنل ایونٹ نیوٹرل وینیو پر ہوں گے، لہذا چیمپئنز ٹرافی 2025 کے لیے بھارت کے تمام میچز متحدہ عرب امارات میں کھیلے جائیں گے۔