پاکستانی شوبز انڈسٹری کی سینئر اداکارہ صائمہ قریشی کی جانب سے ایک پوڈکاسٹ انٹرویو میں خواتین کے حوالے سے دیے جانے والے بیان پر جہاں سوشل میڈیا صارفین کا غصہ تھمنے کا نام نہیں لے رہا وہیں نامور شخصیات بھی آگ بگولہ ہیں۔

معروف کانٹینٹ کریئیٹر تمکنت کے بعد اب بانی پی ٹی آئی عمران خان کی سابقہ اہلیہ ریحام خان نے بھی اداکارہ صائمہ قریشی کو ان کے متنازع بیان پر آڑے ہاتھوں لے لیا۔

صائمہ قریشی نے کیا کہا تھا؟

معروف یوٹیوبر عدنان فیصل کے ساتھ پوڈکاسٹ انٹرویو میں اداکارہ صائمہ قریشی نے گھر چلانے کے حوالے سے بات کرتے ہوئے کہا کہ ’آپ مانیں یا نہ مانیں لیکن یہ بات درست ہے کہ برکت صرف مرد کی کمائی میں ہوتی ہے'۔

انہوں نے کہا کہ 'جب عورت گھر کے اخراجات خود اٹھانے لگتی ہے تو وہ لاشعوری طور پر اس کا اظہار کرتے ہوئے جتاتی بھی ہے جس سے اکثر رشتوں میں تلخی پیدا ہوجاتی ہے‘۔

اسی پوڈکاسٹ میں صائمہ قریشی کا مزید کہنا تھا کہ ’اگر کسی مرد کو دوسری شادی کرنی ہے تو اس کیلئے اپنی بیوی سے اجازت لینے کی ضرورت نہیں ہے کیونکہ یہ حق اسلام نے اسے دیا ہے‘۔

انہوں نے کہا تھا کہ ‘معاشرے سے بے حیائی ختم کرنے کیلئے نکاح کو عام کرنے کی ضرورت ہے اور اگر کسی کو دوبارہ محبت ہوجاتی ہے تو وہ ایکسٹرا میریٹل افیئر چلانے کے بجائے دوسری شادی کرے اور معاملے کو چھپانے کے بجائے اسے کھل کر تسلیم کرے‘۔

ریحام خان کا ردعمل

اداکارہ صائمہ قریشی کے اس بیان کی کلپ سوشل میڈیا پر وائرل ہوتے ہی صارفین کی جانب سے شدید تنقید کا نشانہ بن گئی جس پر اب ریحام خان کا بھی ردعمل سامنے آگیا ہے۔

صائمہ قریشی کے وائرل بیان کے بارے میں بات کرتے ہوئے ریحام خان نے کہا کہ ’ایک پاکستانی خاتون اداکارہ ہیں جن کے انٹرویو کے کلپس وائرل ہو رہے ہیں، میں نے بھی وہ کلپس دیکھے ہیں اور مجھے بھی بہت غصہ آیا، وہ خاتون خود ایکٹر ہیں، کما رہی ہیں اور انٹرویو میں بیٹھ کر کہہ رہی ہیں کہ عورت کی کمائی میں برکت نہیں ہے، یہ کہنا بہت آسان ہے لیکن ایسا کرتے ہوئے آپ ان خواتین کی توہین کر رہی ہے جن کے پاس یہ چوائس نہیں ہے کہ وہ مردوں کی بابرکت کمائی کا انتظار کریں‘۔

'عورت کی کمائی میں برکت نہیں' صائمہ کے بیان پر تمکنت پھٹ پڑیں

لوگ مقبولیت کیلئے ایسے بیانات دیتے ہیں تاکہ وائرل ہوجائیں، تمکنت

انہوں نے کہا کہ ’منافقت اور شعور کی کمی کی حد دیکھیں کہ وہ کہہ رہی ہیں کہ عورت اپنی کمائی جتاتی ہے، میری بہن! مرد بھی جتاتا ہے‘۔

سوشل میڈیا صارفین کی جانب سے ریحام خان کے اس بیان پر مختلف آراء سامنے آ رہی ہیں، بہت سے لوگ صائمہ قریشی کی بات سے اتفاق کرتے ہوئے کہہ رہے ہیں کہ انہوں نے پاکستانی معاشرے کے مطابق بات کی ہے جبکہ کئی سوشل میڈیا صارفین اُن محنت کش خواتین کیلئے آواز اٹھانے پر ریحام خان کی تعریف کر رہے ہیں جن کے پاس اپنا گھر چلانے کیلئے گھر سے باہر قدم رکھنے کے سوا کوئی چارہ نہیں ہے۔