جزیرے کی عام تعریف یہ ہے کہ خشکی کا ایسا قطعہ جس کے چاروں ‏طرف پانی ہو اور اگر تین اطرف میں پانی اور ایک طرف خشکی ہو تو ‏اسے جزیرہ نما کہتے ہیں۔

 یہ جزیرے بہت ہی خوبصورت نظر آتے ہیں ‏لیکن ہم یہاں جزائر کی خوبصورتی‎ ‎‏ کی بات نہیں کر رہے بلکہ آپ کو اہم ‏معلومات دینے جا رہے ہیں وہ یہ کہ کیا آپ جانتے ہیں کہ دنیا میں سب ‏سے زیادہ جزائر کہاں ہیں اور ان کی تعداد کتنی ہے؟ ‏

سویڈن

دنیا میں سب سے زیادہ جزائر سویڈن میں ہیں، اس لیے اگر سوئیڈن کو ‏جزائر کا گھر کہا جائے تو غلط نہ ہوگا کیونکہ اس ملک میں جزیروں کی ‏تعداد جان کر آپ دنگ رہ جائیں گے، سوئیڈن میں دو لاکھ ‏‎67 ‎ہزار 570 ‏جزائر ہے، جن میں سے بیشتر بحیرہ بالٹک میں واقع ہیں۔ ان میں سے ‏بہت سے جزیرے غیر آباد ہیں اور سرسبز و شاداب ہیں۔

فن لینڈ ‏

یہ ملک ایک وسیع ساحلی پٹی اور جزیروں کی ایک ناقابل یقین صف کا ‏حامل ہے، جو متنوع ماحولیاتی نظام اور قدرتی خوبصورتی پیش کرتا ‏ہے۔ سب سے زیادہ جزائر کے اعتبار سے فن لینڈ کا دوسرا نمبر ہے، ‏اس ملک میں موجود جزائر کی تعداد ایک لاکھ 188,000 جزائر ہے۔

ناروے

ناروے کے جزیرے اس کے ناہموار ساحلی پٹی کے ساتھ پھیلے ہوئے ‏ہیں، جن میں بہت سے خوبصورت مناظر پیش کرتے ہیں، متعدد جزائر ‏پر گاؤں آباد ہیں جن میں رہنے والے لوگ ماہی گیری کے پیشے سے ‏وابستہ ہیں۔ ملک میں جزائر کی تعداد کی بات کریں تو یہاں پچاس ہزار ‏کے قریب جزائر موجود ہیں۔

کینیڈا

کینیڈا میں تیس ہزار سے زائد جزائر ہیں، سب سے بڑا جزیرہ بافن ہے، ‏یہ جزیرہ ‏‎507,451 ‎مربع کلومیٹر تک پھیلا ہوا ہے، کینیڈا کے علاقے ‏نناووٹ میں واقع یہ جزیرہ ولیم بافن کے نام سے منسوب ہے، جو ‏‏17ویں صدی کے ایک انگریزی جہاز راں تھے، یہ علاقہ چند چھوٹے ‏ساحلی دیہات کے علاوہ غیر آباد ہے۔

انڈونیشیا ‏

انڈونیشیا دنیا کا سب سے بڑا مجمع الجزائر ہے، جو تقریباً ‏‏17500چھوٹے بڑے جزیروں پر مشتمل ہے اس ملک میں بالی، جاوا ‏اور سماٹرا جیسے دلکش جزیرے دنیا بھر میں مشہور ہیں۔

آسٹریلیا ‏

آسٹریلیا‎ ‎کی ساحلی پٹی کے ارد گرد 8,200 سے زیادہ جزیرے بکھرے ‏ہوئے ہیں، جن میں سب سے بڑا تسمانیہ ہے۔ صرف گریٹ بیریئر ریف ‏‏900 سے زیادہ جزیروں پر مشتمل ہے۔

فلپائن ‏

فلپائن میں بھی ہزاروں کی تعداد میں جزائر موجود ہیں، بحر الکاہل میں ‏پھیلے ہوئے یہ جزائر خوبصورت ساحل، مرجان کی چٹانوں اور دلکش ‏مناظر پر مشتمل ہیں، ان جزائر کی تعداد تقریباً 7,641 ہے۔