ماہرین فلکیات نے کائنات کی سب سے دور دراز کہکشاں میں آکسیجن اور بھاری عناصر کی دریافت کی ہے، جو ایک حیران کن انکشاف ہے۔ یہ کہکشاں زمین سے 13.4 ارب نوری سال کے فاصلے پر واقع ہے، جس کا مطلب ہے کہ یہ کائنات کے ابتدائی دور میں تشکیل پائی تھی۔

ماہرین کے مطابق، کائنات کا آغاز بگ بینگ کے ذریعے 13.8 ارب سال قبل ہوا تھا۔ یہ غیر معمولی حد تک بڑی اور روشن کہکشاں، جسے ‘JADES-GS-z14-0‘ کا نام دیا گیا ہے، سب سے پہلے جنوری 2024 میں جیمز ویب اسپیس ٹیلی اسکوپ کے ذریعے دریافت کی گئی تھی۔ یہ دوربین انفرا ریڈ روشنی میں مشاہدہ کرتی ہے، جو انسانی آنکھ سے پوشیدہ ہوتی ہے، اور اس سے کائنات کی قدیم ترین کہکشاؤں کا سراغ ملتا ہے۔

کہکشاں سے نکل کر زمین تک پہنچنے والی روشنی نے 13.4 ارب سال کا فاصلہ طے کیا، یعنی ماہرین 300 ملین سال پرانی کائنات کو دیکھ رہے ہیں۔

 بعد ازاں، چلی میں موجود آٹاکاما ریجن کی ALMA رصدگاہ نے اس کہکشاں کا مزید مشاہدہ کیا اور وہاں آکسیجن اور بھاری دھاتوں کی موجودگی کا انکشاف کیا۔ یہ اس بات کی علامت ہے کہ ابتدائی کہکشائیں ہماری توقع سے کہیں زیادہ تیزی سے بنی تھیں۔

کہکشاؤں کے درمیان پراسرار پُل؟

جنوبی کوریائی اور امریکی سائنسدانوں نے انکشاف کیا ہے کہ ہماری کہکشاں اور اس کے...

لیڈن یونیورسٹی کے ماہر فلکیات سینڈر شوؤس کا کہنا ہے کہ یہ دریافت اس نظریے کی توثیق کرتی ہے کہ ابتدائی کہکشائیں حیرت انگیز رفتار سے وجود میں آئیں اور پروان چڑھیں۔ JADES-GS-z14-0 کی ساخت اور اس میں بھاری عناصر کی غیر معمولی مقدار نے ماہرین کو حیرت میں ڈال دیا ہے، کیونکہ توقع کے برعکس اس کہکشاں میں بھاری دھاتوں کی کثرت پائی گئی ہے، جو اس بات کی غماز ہے کہ یہاں کئی نسلوں کے بڑے ستارے پہلے ہی پیدا ہو کر فنا ہو چکے ہیں۔

اٹلی کے ماہر فلکیات ڈاکٹر اسٹیفانو کارنیانی نے کہا کہ یہ نتائج اس بات کو ظاہر کرتے ہیں کہ ابتدائی کہکشائیں بہت تیزی سے اپنا ماس اکٹھا کرتی ہیں، جو موجودہ کائناتی ماڈلز کے برعکس ہے۔

یہ کہکشاں اپنی غیر معمولی جسامت اور روشنی کی شدت کے باعث بھی ماہرین کے لیے دلچسپی کا باعث بنی ہے۔ جیمز ویب نے تقریباً 700 دور دراز کہکشاؤں کا مشاہدہ کیا، لیکن یہ کہکشاں نہ صرف سب سے زیادہ دور دراز تھی بلکہ تیسری سب سے زیادہ روشن کہکشاں بھی نکلی۔

زمین کو بلیک ہولز سے کتنا خطرہ ہے؟

کچھ سال پہلے ماہرین فلکیات نے اعلان کیا تھا کہ زمین سے صرف ایک ہزار نوری سال کے...

ماہرین کا کہنا ہے کہ ابتدائی کہکشائیں آج کی کہکشاؤں کے مقابلے میں زیادہ کمپیکٹ اور گیس سے بھرپور ہوتی تھیں۔ اس دریافت سے یہ بھی اشارہ ملتا ہے کہ ابتدائی کہکشاؤں میں ستارے بہت بڑے اور زیادہ تعداد میں پیدا ہوئے ہوں گے، جو ان کی غیر معمولی روشنی کی وضاحت کرتا ہے۔

یہ تحقیق کائنات کے ابتدائی دور کے رازوں کو سمجھنے کی جانب ایک اہم پیش رفت سمجھی جا رہی ہے۔