سفید چہرہ، سرخ بال، اور حیرت میں ڈوبے تاثرات والے  رونلڈ میکڈونلڈ دہائیوں تک فاسٹ فوڈ جائنٹ میکڈونلڈز کی پہچان بنے رہے۔ پہلی بار 1960 کی دہائی میں ٹی وی اشتہارات میں نمودار ہونے والے اس مسخرے نے وقت کے ساتھ میکڈونلڈز کے گولڈن آرچز، بگ میک اور ہیپی میل کی طرح مقبولیت حاصل کی۔

میکڈونلڈز کی مارکیٹنگ مہمات میں رونلڈ میکڈونلڈ اکثر دیگر کرداروں جیسے میئر میک چیز، ہیمبرگلار، گریمس، برڈی دی ارلی برڈ، اور فرائی کڈز کے ساتھ نظر آتے۔ کمپنی نے مختلف مواقع پر مختلف اداکاروں کو رونلڈ میکڈونلڈ کے کردار کے لیے منتخب کیا تاکہ وہ ریستورانوں اور تقریبات میں اس کردار کو زندہ رکھیں، لیکن ٹی وی اشتہارات میں ہمیشہ ایک ہی اداکار کو اس کردار کے لیے منتخب کیا جاتا تھا۔

’مکڈونلڈز' کے اصل مالک کون؟ سب سے بڑی ‘فاسٹ فوڈ چین‘ کی کہانی

اس بزنس ماڈل نے لوگوں کے لیے آسانی پیدا کر دی تھی

رونلڈ میکڈونلڈ ہمیشہ سے ہی تنقید کا نشانہ رہا ہے۔ 2011 میں، 550 سے زائد ڈاکٹروں اور صحت کے ماہرین نے اخبارات میں اشتہارات شائع کر کے یہ دعویٰ کیا کہ بچوں کو فاسٹ فوڈ کی طرف راغب کرنے کے لیے ایک مسخرے کا استعمال "غیر اخلاقی" ہے اور اسے ریٹائر کر دینا چاہیے۔

اب تقریباً ایک دہائی سے یہ عالمی شہرت یافتہ کردار منظر عام سے غائب ہے، اور اس کی وجہ خاصی حیران کن اور خوفناک ہے۔

2016 میں دنیا بھر میں ‘ڈراؤنا مسخرہ‘ مہم شروع ہوئی، جس میں لوگ خوفناک مسخرے کا لباس پہن کر عوام کو دہشت زدہ کرنے لگے۔ یہ سلسلہ امریکہ سے شروع ہوا، لیکن جلد ہی برطانیہ، آسٹریلیا اور برازیل تک پھیل گیا۔

امریکی ریاست ساؤتھ کیرولائنا میں پولیس کو اطلاع ملی کہ مسخرے بچوں کو جنگل میں لے جانے کی کوشش کر رہے ہیں۔ ‘نیو یارک ٹائمز‘ کے مطابق، ان واقعات کے بعد امریکہ میں کم از کم 12 افراد کو گرفتار کیا گیا اور ایک شخص ہلاک ہوا۔

پنسلوانیا میں ایک 16 سالہ لڑکے کو چاقو مار کر ہلاک کیا گیا، اور یہ واقعہ ایک مسخرے کے ماسک میں ملبوس شخص کے اشتعال انگیز رویے کا نتیجہ تھا۔ برطانیہ میں ایک ویڈیو وائرل ہوئی جس میں ایک مسخرہ چینسا چلاتا ہوا نظر آیا، اور آسٹریلیا میں بھی ایک 19 سالہ نوجوان کو ڈرانے کے جرم میں گرفتار کیا گیا۔

میکڈونلڈز کی فروخت میں عالمی سطح پر کمی، وجہ بائیکاٹ یا کچھ اور؟

کمی معمولی ہے لیکن کورونا وبا کے بعد سے ایسا پہلی بار دیکھا گیا۔

اس خوفناک رجحان کے بعد، میکڈونلڈز نے اعلان کیا کہ وہ رونلڈ میکڈونلڈ کی عوامی تقریبات میں شرکت کو محدود کر رہے ہیں۔ کمپنی نے ایک بیان میں کہا، ‘میکڈونلڈز اور اس کے فرنچائز مالکان حالیہ واقعات سے بخوبی واقف ہیں، اور اسی وجہ سے رونلڈ کی عوامی تقریبات میں شرکت کے حوالے سے محتاط رویہ اپنایا جا رہا ہے۔‘

2017 تک رونلڈ میکڈونلڈ کچھ تقریبات میں نظر آتے رہے، لیکن ان کا کردار آہستہ آہستہ کم ہوتا گیا۔ آج وہ نہ تو مارکیٹنگ میں نظر آتے ہیں اور نہ ہی سوشل میڈیا پر۔

تاہم، رونلڈ کی غیر موجودگی کے باوجود، ان کا ایک پرانا ساتھی 2023 میں دوبارہ مقبول ہوا جو جامنی رنگ کا نرم و ملائم کردار ‘گریمس‘ نیویارک میٹس بیس بال ٹیم کے لیے خوش قسمتی کی علامت بن گیا۔