محکمہ تعلیم سندھ نے ڈریس کوڈ کے حوالے سے میڈیا پر گردش کرنے والی خبروں پر وضاحت جاری کردی۔

میڈیا پر یہ اطلاعات سامنے آئی تھیں کہ محکمہ تعلیم سندھ نے اسکولوں کے اساتذہ کے لیے کوڈ آف کنڈکٹ جاری کرتے ہوئے خواتین اساتذہ کے لیے زیادہ میک اپ، زیادہ زیورات اور اونچی ہیلز پہننا ممنوع قرار دے دیا ہے جبکہ مرد اساتذہ کو بھی جینز شرٹ پہننے سے روک دیا۔

جی سی یونیورسٹی میں جینز، ٹی شرٹ اور جوگرز پہننے پر پابندی عائد

ہدایات کی خلاف ورزی کرنے والوں پر جرمانہ ہوگا

میڈیا رپورٹس میں دعویٰ کیا گیا تھا کہ محکمہ تعلیم سندھ نے ہدایت کی ہے کہ خواتین اساتذہ زیادہ میک اپ سے اجتناب برتیں اور اونچی ہیلز پہن کر اسکول نہ آیا کریں جبکہ زیادہ زیورات پہننے سے بھی گریز کریں۔

محکمہ تعلیم نے مرد اساتذہ کو ٹی شرٹ اور جینز پہن کر اسکول آنے گریز کی ہدایت کردی جبکہ خواتین اساتذہ کو بھی روایتی لباس کے انتخاب اور گاؤن پہننے کا مشورہ دیا۔

میڈیا رپورٹس کے مطابق محکمہ تعلیم نے واضح کیا ہے کہ اساتذہ کو اسکولز کے احاطے میں گٹکا، نسوار، ماوا کھانے یا سگریٹ پینے کی اجازت نہیں ہوگی، محکمہ تعلیم نے واضح کیا ہے کہ اساتذہ کا طالب علموں سے ذاتی نوعیت کے کام کرانا سختی سے منع ہے۔

محکمہ تعلیم کی وضاحت

دریں اثنا محکمہ تعلیم سندھ نے ڈریس کوڈ کے حوالے سے میڈیا پر چلنے والی خبروں کی وضاحت کرتے ہوئے کہا ہے کہ اسکولوں میں کسی بھی ڈریس پر پابندی عائد نہیں کی گئی۔

محکمہ تعلیم نے وضاحت جاری کرتے ہوئے کہا ہے کہ اسکولوں میں کسی بھی ڈریس پر پابندی عائد نہیں کی گئی، اساتذہ کے لیے جاری کوڈ آف کنڈکٹ کو حکم نامہ سمجھنے کی بجائے رہنما اصول سمجھا جائے۔

محکمہ تعلیم نے واضح کیا کہ ٹی وی چینلز پر خواتین اساتذہ کے میک اپ، اور ڈریس کے حوالے سے پابندی کی خبریں بے بنیاد ہیں، محکمہ تعلیم نے خواتین اساتذہ کو مشورہ دیا ہے کوئی پابندی عائد نہیں کی۔

کراچی یونیورسٹی میں ڈریس کوڈ کی نئی پابندیاں، اصل وجہ سامنے آگئی

طلبہ ہیجان انگیزیا دھیان بھٹکانے والا لباس پہننے سے گریز کریں، نوٹیفکیشن

وضاحت میں مزید کہا گیا کہ محکمہ تعلیم نے اساتذہ تنظیموں، وکلا اور سول سوسائٹی کی مشاورت سے کوڈ آف کنڈکٹ بنایا ہے، کوڈ آف کنڈکٹ کی تیاری کے لیے تمام اسٹیک ہولڈرز کے ساتھ مشاورتی سیشن رکھے گئے تھے۔

محکمہ تعلیم کا کہنا ہے کہ جاری شدہ کوڈ آف کنڈکٹ میں کہیں بھی پابندی کا لفظ استعمال نہیں کیا گیا، البتہ اساتذہ کے لیے کچھ ڈریس کوڈ اور احتیاط کا مشورہ دیا گیا ہے۔

محکمہ تعلیم کے مطابق جاری شدہ کوڈ آف کنڈکٹ تعلیمی ماحول، وسائل کے استعمال اساتذہ کو معیاری تعلیم دینے کے لیے بنایا گیا ہے، اساتذہ بچوں کے مستقبل کا معمار ہیں جو بچوں کی نفسیاتی اور سماجی رہنمائی کرتے ہیں۔

علاوہ ازیں محکمہ تعلیم کا مزید کہنا ہے کہ اسکولوں میں گٹکا، ماوا، چھالیہ اور سگریٹ کا استعمال بھی ممنوع قرار دیا گیا ہے۔