عالمی شہرت یافتہ پاکستانی گلوکار علی ظفر نے بالی وڈ کے کنگ شاہ رخ خان کے ساتھ گزرے سنہرے دنوں کی یادیں تازہ کرلیں۔

بےشمار لازوال اور مقبول ترین گانے گانے والے علی ظفر نے بالی ووڈ میں اپنے کیریئر کا آغاز 2010 میں فلم "تیرے بن لادن" سے کیا، جس میں ان کی اداکاری اور منفرد مزاحیہ انداز کو خوب سراہا گیا، یہ فلم باکس آفس پر کامیاب رہی اور علی ظفر کو ایک باصلاحیت اداکار کے طور پر متعارف کرایا۔

کنگ خان کے 'کامیابی کے راز' کو علی ظفر ماننے سے انکاری

کامیابی کیلئے سکون کھونا لازمی ہے، شاہ رخ خان

اس کے بعد انہوں نے "میرے برادر کی دلہن"، "لندن، پیرس، نیو یارک"، "چشم بدور" اور "کل دل" جیسی فلموں میں کام کیا۔ ان فلموں میں علی نے نہ صرف اداکاری کے جوہر دکھائے بلکہ اپنی گلوکاری سے بھی ناظرین کو متاثر کیا، جس سے ان کی ہمہ جہت فنکارانہ صلاحیتیں سامنے آئیں۔ ان کی نرم مسکراہٹ، رومانوی انداز اور شائستہ شخصیت نے بھارتی ناظرین میں انہیں مقبول بنایا۔

اگرچہ بعد میں کچھ سیاسی اور سفارتی وجوہات کی بنا پر پاکستانی فنکاروں پر بھارت میں پابندیاں لگ گئیں، لیکن علی ظفر کی بالی ووڈ میں موجودگی نے ایک وقت میں دونوں ممالک کے درمیان ثقافتی تعلقات کو مضبوط کرنے میں اہم کردار ادا کیا۔

اسی دوران شاہ رخ خان سمیت بالی ووڈ کے صفِ اول کے اداکاروں کے ساتھ بھی علی ظفر کی قربتیں بڑھیں اور وہ اکثر بالی ووڈ اسٹارز کی پارٹیوں اور نجی محفلوں میں شریک نظر آتے۔

ڈیفا ایوارڈ، علی ظفر نے بڑا اعزاز اپنے نام کرلیا

گلوکار علی ظفر نے نامور فنکاروں سے بھی ملاقات کی

اُنہی دنوں میں شاہ رخ خان نے اپنی ایک ٹوئٹ میں علی ظفر کے ساتھ پارٹی میں گزرے خوشگوار لمحات کا تذکرہ کیا تھا جس پر حال ہی میں علی ظفر نے ایک بار پھر تبصرہ کیا ہے۔

سال 2014ء میں کی گئی اس ٹوئٹ میں شاہ رخ خان نے لکھا تھا کہ 'مڈ ڈے پارٹی میں بہت زیادہ خوشی ملی اور لطف آیا، اچھے لوگ آپ کو اچھا محسوس کرواتے ہیں، آپ سب کا شکریہ، اور علی ظفر کے گانے ہر سُو نے تو دھوم مچادی'۔

شاہ رخ خان کی اس پوسٹ کے جواب میں علی ظفر نے لکھا 'ہاہاہا! ایسے جیسے ہر سُو بہار ہے، یقین نہیں آرہا کہ میں سُن رے سجنیا کے بول بھول گیا تھا اور آپ کو یاد تھے، خوش رہیں آپ'۔

اس مکالمے کو حال ہی میں ایک 'ایکس' صارف نے ری شیئر کرتے ہوئے علی ظفر سے سوال کیا کہ 'کیا آپ کو یہ گفتگو یاد ہے؟'

جواب میں علی ظفر نے بھی پوسٹ کو ری شیئر کرتے ہوئے لکھا کہ 'ہاں، شاہ رخ خان تو سراپا محبت ہیں'۔

واضح رہے کہ شاہ رخ خان کی فلم 'ڈیئر زندگی (2016)' میں علی ظفر نے ایک دلکش موسیقار 'رومی' کا مختصر کردار ادا کیا تھا، جو مرکزی کردار کائرہ (عالیہ بھٹ) کی زندگی میں ایک رومانوی دلچسپی کے طور پر آتا ہے۔ 

علی ظفر نے آئمہ بیگ کی بھارتی ہمشکل ڈھونڈ نکالی

علی ظفر کا کردار ایک حساس، خوش مزاج اور فنکارانہ طبیعت کا حامل نوجوان ہے جو اپنی موسیقی اور نرم گفتاری سے کائرہ کو متاثر کرتا ہے۔

اگرچہ فلم میں ان کا کردار مختصر تھا لیکن علی ظفر کی موجودگی نے کہانی میں نرمی، خوبصورتی اور ایک ہلکی پھلکی رومانوی جھلک شامل کی، جسے ناظرین نے خوب پسند کیا۔