ایوب خان پاکستان کے پہلے فوجی صدر تھے جنہوں نے 27 اکتوبر 1958 کو مارشل لا نافذ کر کے اقتدار سنبھالا، ان کے دور کو ترقی اور استحکام کا دور بھی کہا جاتا ہے اور جمہوریت کے زوال کا زمانہ بھی۔

سینئر صحافی و کالم نگار حامد میر نے اپنے تازہ کالم میں ایوب خان کے دورِ حکومت سے متعلق چند دلچسپ حقائق بیان کیے ہیں۔

فاطمہ جناح کو الیکشن لڑنے پر راضی کرکے دھوکہ دینے والا کون تھا؟

حامد میر نے اپنے کالم میں تاریخی حقائق پر روشنی ڈالی۔

کالم کے آغاز میں حامد میر لکھتے ہیں کہ 'پاکستان کے حکمران طبقے نے تاریخ سے سبق نہ سیکھنے کی ٹھان رکھی ہے۔ پاکستان کا جغرافیہ بدل گیا لیکن تاریخ سے سبق سیکھنا آج بھی توہین سمجھا جاتا ہے۔ جغرافیہ بدلتا ہے تو بدلے کسی نہ کسی بڑے صاحب کی انا مجروح نہیں ہونی چاہئے۔ جو لوگ آج کے ارباب اختیار کے بہت قریب ہیں یہ دس پندرہ سال کے بعد بتائیں گے کہ انکے کون کون سے سابقہ باس نے پاکستان کو کیا کیا نقصانات پہنچائے۔ ہوسکتا ہے کہ الطاف گوہر جیسا کوئی بیورو کریٹ یہ دعویٰ بھی کر دے کہ اس نے تو بہت کوشش کی کہ پاکستان میں صوبائی منافرت نہ بڑھے لیکن کسی نے اس کی سنی ہی نہیں'۔

حامد میر بتاتے ہیں کہ 'الطاف گوہر صرف 39 سال کی عمر میں وفاقی سیکرٹری اطلاعات بن گئے تھے۔ پاکستان کے پہلے فوجی آمر جنرل ایوب خان کے اتنے زیادہ قریب تھے کہ لوگ انہیں پاکستان کا وائس پریذیڈنٹ سمجھتے تھے۔ جنرل ایوب خان کی کتاب ’’فرینڈز ناٹ ماسٹرز‘‘ کے اصل مصنف بھی الطاف گوہر تھے جس کا اعتراف انہوں نے اپنی عمر کے آخری حصے میں کیا۔ جب انہوں نے اپنی آپ بیتی لکھنی شروع کی تو کینسر کا شکار ہوگئے اور آپ بیتی مکمل نہ کر سکے لیکن ان کی ادھوری آپ بیتی ’’گوہر گزشت‘‘ کے نام سے شائع کر دی گئی۔ یہ کتاب ان کی وفات کے بعد شائع ہوئی'۔

پہلے فوجی صدر کے پوتے عمر ایوب کا سیاسی سفر

پاکستان تحریک انصاف کے بانی اور سابق وزیراعظم عمران خان نے پارٹی رہنما عمر ایوب...

حامد میر نے اپنے کالم میں دلچسپ انکشاف کیا کہ 'آج کل کم از کم تین ریٹائرڈ بیوروکریٹ اپنی اپنی آپ بیتی لکھ رہے ہیں۔ ایک صاحب جنرل مشرف کے بہت قریب تھے۔ دوسرے دو صاحبان نواز شریف کے بہت قریب تھے۔ ان میں سے ایک محترم ریٹائرڈ بیوروکریٹ نے مجھے بتایا کہ ان کی کتاب مکمل ہو چکی ہے اور انہوں نے صرف ماضی کے حکمرانوں کی نہیں بلکہ اپنی غلطیوں کا اعتراف بھی کیا ہے'۔

حامد میر اپنے کالم میں لکھتے ہیں کہ 'الطاف گوہر نے بھی ’’گوہر گزشت‘‘میں یہ اعتراف کیا ہے کہ ایک دفعہ انہوں نے مشرقی پاکستان میں بطور مجسٹریٹ ایک بنگالی کو اپنی حراست میں بہت مارا پیٹا تو ان پر مقدمہ درج ہوگیا لیکن انہوں نے جج کے ساتھ ملی بھگت کرکے خود کو سزا سے بچا لیا'۔

حامد میر کے بقول 'الطاف گوہر نے اپنے باس جنرل ایوب خان کے بارے میں جو انکشافات کئے ہیں وہ ناقابل معافی ہیں اور آج کے پاکستان کو درپیش مسائل کا پس منظر سمجھنے میں بہت مدد دیتے ہیں۔ الطاف گوہر لکھتے ہیں کہ جنرل ایوب خان 1954ء میں فوج کے سربراہ کے ساتھ ساتھ وزیر دفاع بھی بنا دیئے گئے اور انہوں نے کابینہ کے اجلاسوں میں بیٹھنا شروع کر دیا تو انہیں محسوس ہوا کہ ان کے اندر قوم کا نجات دہندہ چھپا بیٹھا ہے۔ اس نجات دہندہ کو باہر لانے کیلئے انہوں نے ایک مقالہ تحریر کیا۔ 1954ء میں لکھے گئے اس مقالے کا عنوان تھا ’’پاکستان کے موجودہ اور آئندہ مسائل کا ایک مختصر جائزہ‘‘۔ انہوں نے پاکستان کے مسائل کا حل صدارتی نظام کو قرار دیا۔ یہ دستاویز انہوں نے کابینہ کے اجلاس میں پیش کی۔ کابینہ نے اس دستاویز کو بحث کے قابل نہ سمجھا اور کچھ عرصہ بعد پاکستان میں 1956ء کا آئین منظور کرلیا گیا۔ اب جنرل ایوب خان وزیر دفاع نہ رہے۔ وہ 1956ء کے وفاقی پارلیمانی آئین کے خلاف تھے۔ انہیں دو دفعہ مدت ملازمت میں توسیع مل چکی تھی اب وہ تیسری توسیع کے لئے سرگرم تھے۔ صدر اسکندر مرزا ان کی اس خواہش سے آگاہ تھے۔ اسکندر مرزا کی کوشش سے وزیر اعظم ملک فیروز خان نون نے جون 1958ء میں انہیں دو سال کی مزید توسیع دے دی۔ توسیع حاصل کرنے کے چند ماہ بعد ایوب خان نے اسکندر مرزا کے ساتھ مل کر اکتوبر 1958ء میں مارشل لا نافذ کردیا اور آرمی چیف کے ساتھ ساتھ وزیراعظم بھی بن گئے۔ پھر وزیراعظم کو محسوس ہوا کہ اصل اختیار تو صدر کے پاس ہے تو انہوں نے صدر مملکت سے استعفیٰ لے کر صدر کے عہدے پر بھی قبضہ کرلیا اور یوں 1956ء کے آئین کی کہانی ختم ہوگئی'۔

عمر ایوب کی تقریر کے وقت لائیو اسٹریم بند

سنی اتحاد کونسل کے   وزیراعظم کے امیدوار عمر ایوب خان کی تقریر کے وقت لائیو...

حامد میر بتاتے ہیں کہ 'الطاف گوہر نے انکشاف کیا ہے کہ مارشل لا کے نفاذ سے بہت پہلے جنرل ایوب خان 1956ء کا آئین منسوخ کرنے کا منصوبہ بنا چکے تھے اور اس سلسلے میں ایک مذہبی اسکالر غلام احمد پرویز سے ان کا مستقل رابطہ تھا۔ پرویز صاحب نے جون 1957ء میں جنرل ایوب خان سے کہا تھا کہ وہ اقتدار سنبھال لیں کیونکہ 1956ء کے غیراسلامی آئین کو منسوخ کرنا بہت ضروری ہے۔پرویز صاحب پارلیمانی نظام کے بھی خلاف تھے اور سیاسی جماعتوں کو بھی غیر اسلامی سمجھتے تھے لہٰذا نہوں نے ایک نیا اسلامی آئین بنانے کی تجویز دی تھی۔ جب مارشل لا نافذ ہوگیا تو 18 جون 1959ء کو پرویز صاحب نے ایک خط کے ذریعے جنرل ایوب خان کو یاد دلایا کہ ملک کو ایک ترقی پسندانہ اسلامی آئین کی ضرورت ہے۔ ایک اور صاحب پیر علی محمد راشدی تھے۔ وہ فلپائن میں پاکستان کے سفیر تھے۔ انہوں نے 19 دسمبر 1960ء کو ایوب کے نام خط میں تجویز دی کہ وہ ملک میں بادشاہت نافذ کردیں اور اپنی بادشاہت کا اعلان کر دیں۔ ایوب خان نے جمہورت، اسلام اور بادشاہت کو ملا کر 1962ء کا آئین تشکیل دیا اور ملک میں صدارتی نظام نافذ کردیا جسے ان کے بنگالی وزیر قانون جسٹس محمد ابراہیم نے مسترد کردیا اور مستعفی ہوگئے'۔

حامد میر نے اپنے کالم میں بتایا کہ 'الطاف گوہر نے اپنی کتاب میں جگہ جگہ دعویٰ کیا ہے کہ انہوں نے بہت کوشش کی کہ جنرل ایوب خان اور بنگالی اہل فکر و دانش کو قریب لایا جائے تاکہ مشرقی اور مغربی پاکستان میں دوریاں ختم ہوں۔ وہ جب بھی کسی بنگالی صحافی یا ادیب کو ایوب خان سے ملواتے تو ایوب خان کے بنگالی وزیر ان صحافیوں اور ادیبوں کے خلاف باس کے کان بھرتے۔ انہیں ڈر لگا رہتا تھا کہ اگر ایوب خان کو کوئی پڑھا لکھا بنگالی پسند آگیا تو ان بنگالی وزیروں کی چھٹی ہو جائے گی جو خوشامد سے ان کے قریب آئے تھے'۔

بار بار بدلتے مؤقف پر حامد میر سے دلچسپ مکالمہ

سینئر صحافی نے قاضی فائز عیسیٰ کی حمایت کے بعد مخالفت کیوں کی؟

اپنے کالم میں حامد میر نے مزید بتایا کہ 'ایک دفعہ الطاف گوہر نے ایوب خان کو یاد دلایا کہ آپ نے 1962ء کے آئین میں ڈھاکہ کو دوسرا دارالخلافہ بنایا ہے لیکن وہاں کوئی وفاقی دفتر منتقل نہیں کیا گیا۔ یہ سن کر ایوب خان برہم ہوگئے اور انہوں نے بڑی بیزاری سے کہا 'یارا، ان لوگوں نے ہمارے ساتھ نہیں رہنا، میں نے دوسرا دارالخلافہ اس لئے بنوا دیا کہ جب یہ ہم سے جدا ہوں تو ان کےپاس کوئی دفتر تو ہو''۔

حامد میر نے یاددہانی کروائی کہ 'جنرل ایوب خان نے کئی سینئر افسروں کو نظرانداز کرکے جنرل یحییٰ کو آرمی چیف بنایا تھا اور پھر اسی یحییٰ نے اپنے باس سے استعفیٰ لے کر دوبارہ مارشل لا لگا دیا۔ الطاف گوہر سے وہ تمام سول اعزازات واپس لے لئے جو انہوں نے باس سے قربت کے نتیجے میں حاصل کئے تھے۔ پھر الطاف گوہر صحافی اور مصنف بن گئے'۔

کالم کے اختتام میں حامد میر لکھتے ہیں کہ 'آنے والے وقت میں الطاف گوہر جیسے کئی ریٹائرڈ بیوروکریٹ اپنی کتابوں میں آپ کو بتائیں گے کہ جنرل ضیاء الحق، جنرل پرویز مشرف، بےنظیر بھٹو، نواز شریف، عمران خان اور شہباز شریف نے اپنے اپنے دور حکومت میں کیا غلطیاں کیں۔ سوال یہ ہے کہ جب غلطی ہو رہی ہوتی ہے تو اس وقت نشاندہی کیوں نہیں کی جاتی؟ کیا کوئی حاضر سروس بیورو کریٹ یہ بتانا پسند کرے گا کہ جب 8 فروری 2024ء کے الیکشن سے چند دن قبل 6 نئی نہروں کے متنازع منصوبے کی تشکیل ہوئی تو کسی نے کسی سرکاری فائل پر اس منصوبے سے پاکستان کی سلامتی کو پہنچنے والے خطرات سے آگاہ کیا تھا یا نہیں؟'