سوشل میڈیا کی معروف کمپنی میٹا نے انسٹاگرام پر نابالغ صارفین کے لیے لائیو اسٹریمنگ پر نئی پابندیاں عائد کرتے ہوئے اعلان کیا کہ اب 16 سال سے کم عمر کے افراد بغیر والدین کی اجازت کے انسٹاگرام پر لائیو نشریات نہیں کر سکیں گے۔

برطانوی جریدے دی گارجین کی رپورٹ کے مطابق یہ اقدام کئی ممالک کی جانب سے سوشل میڈیا پلیٹ فارمز پر نوجوانوں کے تحفظ سے متعلق قوانین پر بڑھتی ہوئی تنقید کے بعد اٹھایا گیا ہے۔

کمپنی نے بتایا کہ نئی پالیسی کے تحت 16 سال سے کم عمر صارفین لائیو اسٹریمنگ صرف اس صورت میں کر سکیں گے جب انہیں ’ٹین اکاؤنٹس سسٹم‘ کے تحت والدین یا سرپرستوں کی جانب سے باقاعدہ اجازت حاصل ہو۔

اس کے ساتھ ہی میٹا نے نابالغ صارفین کے لیے پرائیویسی سیٹنگز کو مزید سخت کر دیا ہے، جس کا اطلاق فیس بک اور میسینجر پر بھی ہوگا۔ 

انسٹاگرام پر ایک نئے دلچسپ فیچر کا اضافہ

فی الحال تمام صارفین کو تین منٹ طویل ریلز اپ لوڈ کرنے کی سہولت حاصل نہیں

ان اقدامات کا مقصد کم عمر صارفین کو نامناسب، نازیبا یا نقصان دہ ویڈیوز اور تصاویر سے بچانا ہے۔ اب ایسی صورت میں مواد کو دیکھنے یا اس کی فلٹرنگ ختم کرنے کے لیے بھی والدین کی اجازت لازمی قرار دی گئی ہے۔

میٹا نے گزشتہ چند برسوں کے دوران کم عمر صارفین کی آن لائن سیکیورٹی اور ذہنی صحت کے تحفظ کے لیے متعدد اہم فیچرز متعارف کروائے ہیں۔ 

ان میں پیرنٹل کنٹرولز، کانٹینٹ فلٹرز، اسکرین ٹائم مینجمنٹ اور پرائیویسی انحفاظات شامل ہیں۔ کمپنی کا کہنا ہے کہ وہ بچوں کے لیے محفوظ ڈیجیٹل ماحول فراہم کرنے کے لیے مسلسل کام کر رہی ہے۔

یاد رہے کہ میٹا کے علاوہ ٹک ٹاک سمیت دیگر ویڈیو شیئرنگ پلیٹ فارمز نے بھی نابالغ صارفین کے لیے سخت حفاظتی اقدامات متعارف کرائے ہیں۔ 

انسٹاگرام کا اپنی ٹک ٹاک ایپ بنانے کا اعلان

امریکا میں ٹک ٹاک کو سخت پابندیوں کا سامنا ہے

ان سوشل ایپس پر دنیا بھر کے لاکھوں نوجوان صارفین موجود ہیں، جنہیں بعض اوقات غیر مناسب اور خطرناک مواد کا سامنا کرنا پڑتا ہے۔ اس حوالے سے عالمی سطح پر بھی قوانین سخت کیے جا رہے ہیں تاکہ آن لائن پلیٹ فارمز کو محفوظ بنایا جا سکے۔

ماہرین کا کہنا ہے کہ ایسے اقدامات نہ صرف نابالغ صارفین کی ڈیجیٹل حفاظت کو یقینی بنائیں گے بلکہ ان کے جذباتی و ذہنی استحکام پر بھی مثبت اثر ڈالیں گے۔ 

والدین کو بھی چاہیے کہ وہ بچوں کے سوشل میڈیا استعمال پر نظر رکھیں اور ان کی رہنمائی کریں تاکہ وہ محفوظ ڈیجیٹل تجربہ حاصل کر سکیں۔