کینیڈا کے عالمی شہرت یافتہ گلوکار جسٹن بیبر کے فوٹوگرافرز کے ساتھ اختیار کیے گئے غیر مناسب رویے کی ویڈیو سوشل میڈیا پر وائرل ہوگئی۔

بین الاقوامی میڈیا رپورٹس کے مطابق 31 سالہ جسٹن بیبر ایک کافی شاپ پر اپنے دوستوں کے ہمراہ پہنچے تو وہاں موجود فوٹوگرافرز کو دیکھ کر وہ شدید برہم ہوگئے۔

 ویڈیو میں دیکھا جا سکتا ہے کہ جب ایک فوٹوگرافر نے ان سے خوش اخلاقی سے ’گڈ مارننگ‘ کہا، تو جسٹن بیبر نے سخت ردِعمل دیتے ہوئے کہا،‘نہیں، گڈ مارننگ نہیں! تم جانتے ہو کہ تم یہاں کیوں آئے ہو؟ پیسہ، پیسہ، پیسہ! تم لوگوں کو صرف پیسہ چاہیے، انسانیت کی کوئی قدر نہیں۔‘

جسٹن بیبر نے اپنے غصے کے مسائل کا اعتراف کرلیا

میں بہتر بننا چاہتا ہوں اور اتنا ردِعمل ظاہر نہیں کرنا چاہتا، جسٹن بیبر

اس واقعے کے بعد سوشل میڈیا صارفین کی جانب سے جسٹن بیبر کے رویے پر تنقید کی جا رہی ہے جب کہ بعض مداح ان کے جذباتی ردِعمل کو ان کی ذہنی کیفیت سے جوڑ کر تشویش کا اظہار بھی کر رہے ہیں۔

ویڈیو مختلف پلیٹ فارمز پر وائرل ہو چکی ہے، اور صارفین اس پر ملا جلا ردعمل دے رہے ہیں۔ 

کچھ افراد نے جسٹن کے رویے کو غیر مناسب قرار دیا، جب کہ دیگر کا کہنا ہے کہ شہرت پانے کے بعد فنکار اکثر ان ہی فوٹوگرافرز کو برا بھلا کہنے لگتے ہیں، جو کبھی ان کی تصاویر لینے کے لیے خود بلائے جاتے تھے۔

بعض سوشل میڈیا صارفین کا کہنا ہے کہ مشہور شخصیات کو بھی اپنی نجی زندگی کا حق حاصل ہے، لیکن اپنی شہرت کی بنیاد بنانے والے افراد کے ساتھ عزت و احترام سے پیش آنا بھی ان کی اخلاقی ذمہ داری ہے۔