جدید دور میں مسافروں کے لیے سستی اور آرام دہ رہائش کی تلاش ‏ایک مسلسل چیلنج بن چکی ہے۔ ہوٹلوں کے بڑھتے ہوئے نرخوں اور ‏جگہ کی کمی کے پیش نظر، دنیا بھر میں کیپسول ہوٹلوں کا رجحان تیزی ‏سے مقبول ہو رہا ہے۔ یہ منفرد ہوٹل مسافروں کو نہ صرف بجٹ میں ‏رہائش فراہم کرتے ہیں بلکہ ان کے قیام کو یادگار بھی بناتے ہیں۔ ‏

کیپسول ہوٹل کی تاریخ 1979 ء میں اوساکا، جاپان سے شروع ہوتی ‏ہے، جہاں یہ بنیادی طور پر کاروباری افراد کے لیے بنائے گئے تھے ‏تاکہ وہ دیر رات کام کے بعد آرام کرسکیں۔ وقت کے ساتھ یہ تصور ‏سیاحوں میں بھی مقبول ہوگیا اور اب دنیا کے مختلف حصوں میں یہ ‏منفرد انداز میں ڈھل چکا ہے۔ آئیے دنیا کے 8 سب سے منفرد کیپسول ‏ہوٹلوں پر ایک نظر ڈالتے ہیں:‏

نائن آورز، جاپان ‏

جاپان میں 13 ہوٹلوں پر مشتمل ’نائن آورز‘ اپنے سادہ اور جدید طرز ‏کے لیے مشہور ہے۔ جیسا کہ نام سے ظاہر ہے، یہ کیپسول ہوٹل اس ‏تصور پر مبنی ہے کہ آپ کو ہوٹل میں صرف 9 گھنٹے درکار ہوتے ہیں۔ ‏ایک گھنٹہ نہانے کے لیے، 7گھنٹے نیند کے لیے اور ایک گھنٹہ صبح ‏تیار ہونے کے لیے۔ ہر کیپسول میں فون چارج کرنے کے لیے یو ایس ‏بی پورٹ، دو چھوٹی شیلفیں اور ایک لائٹ سوئچ موجود ہوتا ہے۔ ‏مشترکہ جگہ میں بنچ، انفرادی ورک ڈیسک اور ایک لمبی مشترکہ میز ‏شامل ہے۔ ہوٹل میں پورے فلور پر باتھ رومز موجود ہیں جن میں قطار ‏میں بنے ٹوائلٹ اور شاور اسٹالز شامل ہیں۔ دلچسپ بات یہ ہے کہ یہ ‏ہوٹل مہمانوں کی نیند کے معیار پر بھی خصوصی توجہ دیتا ہے۔ یہ انفرا ‏ریڈ کیمروں، مائیکرو‎ ‎فونز اور موشن سینسرز کے ذریعے مہمانوں کی ‏نیند کا ڈیٹا جمع کرتا ہے۔ یہاں مہمانوں کی سانسیں، دل کی دھڑکن اور ‏نیند کے انداز کا تجزیہ کیا جاتا ہے تاکہ ان کی نیند کے معیار کو بہتر ‏بنایا جا سکے۔ اگر آپ کسی سائنسی تجربے کا حصہ بننے کے خواہاں ‏ہیں تو یہ ہوٹل ایک منفرد موقع فراہم کرتا ہے۔ ہر پوڈ کا کرایہ فی رات ‏‎3800 ‎‏ سے ‏‎30‎‏ ہزار ین (تقریباً 26 ڈالرز سے 203ڈالرز) کے درمیان ‏ہوتی ہے۔

اسکائی لاج ایڈونچر سوئٹس، پیرو

پیرو کے سیکرڈ ویلی میں واقع اسکائی لاج ایڈونچر سوئٹس عام ہوٹلوں ‏سے بالکل مختلف ہے۔ یہ ہوٹل ایک پہاڑی چٹان پر 1,312 فٹ کی بلندی ‏پر واقع ہے۔ یہاں آپ کو چٹانوں سے معلق شفاف پوڈز میں سونے کا ‏موقع ملے گا۔ ان پوڈز تک پہنچنے کے لیے سیدھی چٹان پر چڑھنا پڑتا ‏ہے جبکہ واپسی کے لیے زپ لائنز موجود ہیں۔ رات کے وقت ستاروں ‏سے سجے آسمان کا نظارہ کسی جادوئی خواب سے کم نہیں ہوتا۔ ہوٹل ‏کُسکو اور ماچو پِچو کے درمیان واقع ہے، یہ ہوٹل ایک پُرسکون مقام ‏پر واقع ہے زیادہ تر لوگ یہاں ایک رات قیام کرتے ہیں اور ناشتہ کرنے ‏کے بعد کُسکو واپس چلے جاتے ہیں یا ماچو پِچو کی جانب روانہ ہو ‏جاتے ہیں۔ ہوٹل مہمانوں کو ہلکا سامان ساتھ لانے کی تجویز دیتا ہے، ‏کیونکہ انہیں اپنا بیگ خود اپنے کمروں تک لے جانا پڑتا ہے۔ تاہم ہوٹل ‏کی جانب سے اُروبامبا میں ایک اسٹوریج کی سہولت بھی فراہم کی جاتی ‏ہے۔ اس کے علاوہ آرام دہ لباس پہننا ضروری ہے، جیسے لمبی پینٹ، ‏ہائیکنگ جوتے، گرم کپڑے اور جیکٹ۔ ہوٹل میں کمرا بُک کروانے کے ‏لیے کم از کم15 سال کی عمر ہونا ضروری ہے۔ مہمانوں کو اپنے کمرے ‏تک چڑھنے سے پہلے حفاظتی ہدایات دی جاتی ہیں۔ ‏

تقریباً 1300 فٹ کی بلندی پر چڑھنے کے بعد مہمانوں کو24 بائی 8 فٹ ‏کا ایک کیپسول کمرا ملتا ہے۔ یہ کمرے آرام دہ ہیں جن میں چار بستر، ‏تکیے، کمبل، ایک کھانے کی جگہ اور ایک نجی ماحولیاتی باتھ روم ‏شامل ہوتا ہے۔ ہوٹل میں شاور کی سہولت موجود نہیں، لیکن کھلی فضا ‏میں ایک گرم پانی کا ٹب دستیاب ہے۔ توانائی کے لیے شمسی پینلز ‏استعمال کیے جاتے ہیں جبکہ کمروں میں لیمپ بھی لگائے گئے ہیں۔ ‏

اسٹار لاج ایڈونچر سوئٹس میں کرایہ فی کس لیا جاتا ہے، نہ کہ فی ‏کیپسول۔ سنگل قیام کی قیمت436.17 ڈالرز ہے۔ اگر زپ لائن یا وایا فیراتا ‏چڑھائی شامل ہو تو قیمت484 ڈالرز ہوگی۔ ایک رات کے قیام کے ساتھ ‏دونوں سرگرمیوں (زپ لائن اور وایا فیراتا چڑھائی) کا پیکج 509.31 ‏ڈالرز میں دستیاب ہے۔

توبو ہوٹل، کولمبیا

کولمبیا کے تاٹاکوا صحرا میں واقع توبو ہوٹل اپنے 37 منفرد کمروں کی ‏وجہ سے مشہور ہے، جو بڑے کنکریٹ کے پائپوں سے بنائے گئے ہیں۔ ‏یہ ہوٹل نہ صرف سستا ہے بلکہ اس میں ایک سوئمنگ پول، باغ، بار ‏اور ریستوران بھی موجود ہے، جہاں مہمان صحرا کے حسن کو قریب ‏سے محسوس کرسکتے ہیں۔

فری اسپرٹ اسفیئرز، کینیڈا

کینیڈا میں فری اسپرٹ اسفیئرز ایک ایسا منفرد کیپسول ہوٹل ہے جو ‏قدیم درختوں کے درمیان معلق لکڑی کے گولے نما پوڈز پر مشتمل ہے۔ ‏ہر پوڈ میں ہاتھ سے بنائے گئے لکڑی کے فرنیچر اور کھڑکیوں سے ‏باہر نظر آنے والے جنگلاتی مناظر قیام کو مزید یادگار بنا دیتے ہیں۔ فری ‏اسپرٹ اسفیئرز، برٹش کولمبیا کے ساحلی جنگلات میں معلق منفرد، ‏دستکاری سے تیارکردہ ٹری ہاؤسز ہیں جو ایک دلکش اور ماحول ‏دوست قیام کا تجربہ فراہم کرتے ہیں۔ یہ گولائی میں بنے ہوئے اسٹرکچر ‏درختوں کے درمیان واقع ہیں جو فطرت سے جڑنے کے خواہشمند افراد ‏کے لیے ایک پُرسکون اور پائیدار قیام کا موقع دیتے ہیں۔ یہاں تین ‏مختلف اسفیئرز دستیاب ہیں، اور ہر ایک کا اپنا منفرد نام اور تھیم ہے۔ ‏ایک اسفیئر میں دو افراد کے لیے ایک آرام دہ ڈبل بیڈ موجود ہے جبکہ ‏ایک چھوٹے لاج میں تیسرا فرد بھی قیام کر سکتا ہے۔ اس میں ایک ‏چھوٹا فریج، سنک اور چائے یا کافی بنانے کا انتظام بھی شامل ہے۔ ‏سوئٹ میں قیام کی قیمت355 ڈالرز سے 395 ڈالرز فی رات تک ہیں۔ ‏

کِن کیپسول، سنگاپور

سنگاپور میں واقع کِن کیپسول ایک جدید اور آرام دہ کیپسول ہوٹل ہے ‏جہاں ’’سوفٹ مینیمالسٹ‘‘ طرز اپنایا گیا ہے۔ اس ہوٹل کے کمروں میں ‏ہلکی آڑو رنگت کی دیواریں اور نورڈک جنگلات کی مہک بکھیرنے ‏والی خوشبو مہمانوں کو سکون فراہم کرتی ہے۔ یہ ہوٹل ان مسافروں ‏کے لیے مثالی ہے جو پُرسکون اور خوشگوار ماحول میں قیام کرنا ‏چاہتے ہیں۔ اگر آپ کو صرف چند گھنٹوں کے لیے ایک بستر اور بنیادی ‏سہولتیں درکار ہیں تو کِن کیپسول ہوٹل میں بکنگ کروائیں، جہاں قیمت ‏محض7 ڈالرز فی گھنٹہ سے شروع ہوتی ہے۔ یہاں آپ کو ایک نجی ‏کیپسول میں قیام کا موقع ملے گا جس میں آرام دہ گدّا اور بلیک آؤٹ ‏بلائنڈز لگے ہوتے ہیں تاکہ روشنی مکمل طور پر بند کی جا سکے اور ‏آپ دن کے وقت بھی پُرسکون نیند لے سکیں۔

اٹیلیئر تاؤ پلس سی، چین ‏

چین کے مشرقی صوبے زی جیانگ میں ایک منفرد بک اسٹور کیپسول ‏ہوٹل موجود ہے جہاں کتابوں کے درمیان سونے کا تجربہ حاصل کیا جا ‏سکتا ہے۔ اٹیلیئر تاؤ پلس سی نے ٹونگلو، چین کے گاؤں چِنگ لونگ ‏وو میں مسافروں اور کتابوں کے شوقین افراد کے لیے ایک منفرد ‏کیپسول ہوسٹل اور بک اسٹور ڈیزائن کیا۔ یہاں20 کیپسول کمروں کے ‏درمیان کتابوں کی الماریاں موجود ہیں جو خاص طور پر کتابوں کے ‏شوقین افراد کے لیے ایک خوابناک ماحول فراہم کرتی ہیں۔ یہ کیپسول ‏ہوٹل اور بک اسٹور گھنے جنگلات میں واقع ہے۔ یہ ایک پرانا مکان تھا ‏جو لکڑی کے ڈھانچے اور مٹی کی دیواروں پر مشتمل تھا، جس کا رقبہ ‏‏232 مربع میٹر اور اونچائی7.2 میٹر تھی۔ اٹیلیئر تاؤ پلس سی نے اس ‏پرانی عمارت کو ازسرنو ڈیزائن اور بحال کرتے ہوئے اسے ایک کیپسول ‏ہوٹل میں تبدیل کیا، جو20 افراد کو رہائش فراہم کرسکتا ہے، ساتھ ہی ‏ایک کمیونٹی بک اسٹور اور لائبریری بھی شامل کی گئی۔ ‏

ڈی بیڈستی ہوٹل، ایمسٹرڈیم

ایمسٹرڈیم میں واقع ڈی بیڈستی ہوٹل اپنی منفرد طرز کی وجہ سے ‏مشہور ہے۔ یہاں مہمان 17ویں صدی کے روایتی ڈچ ’’بکس بیڈ‘‘ میں ‏سوتے ہیں جو لکڑی کے پردوں اور سیڑھیوں کے ساتھ ایک روایتی ‏مگر جدید تجربہ فراہم کرتے ہیں۔

ریسول پوشٹل، ٹوکیو

ٹوکیو میں ریسول پوشٹل ایک آرام دہ اور جدید کیپسول ہوٹل ہے، جو ‏روایتی جاپانی طرزِ تعمیر اور جدید سہولتوں کا امتزاج پیش کرتا ہے۔ ‏یہاں مہمان ایک منفرد کیپسول میں قیام کا لطف اٹھا سکتے ہیں، جس ‏کی دیواروں اور چھت پر روایتی جاپانی آرٹ سجا ہوا ہے۔ آواز کی بہتر ‏موصلیت (ساؤنڈ انسولیشن) کے لیے، کیپسول میں دُہری تہہ والے ‏پردے لگائے گئے ہیں۔ گروپ میں سفر کرنے والے مہمان پورا کمرا ‏اپنے لیے مخصوص کرسکتے ہیں تاکہ ان کا قیام یادگار بن سکے۔ اس ‏کے علاوہ ہوٹل میں ایک خوبصورت لابی بھی موجود ہے جہاں تاتامی ‏نشستیں مہمانوں کو مکمل آرام کا موقع فراہم کرتی ہیں اور وہ یہاں بیٹھ ‏کر دن کی مہمات کی منصوبہ بندی بھی کرسکتے ہیں۔