مصنوعی ذہانت کی معروف کمپنی اوپن اے آئی کی جانب سے ایک نئے سوشل میڈیا پلیٹ فارم کی تیاری پر غور کیا جا رہا ہے، جو ایلون مسک کے ’ایکس‘ (سابقہ ٹوئٹر) اور مارک زکربرگ کے انسٹاگرام کی خصوصیات کا امتزاج ہو سکتا ہے۔

خبر رساں ادارے رائٹرز نے اپنی رپورٹ میں ٹیکنالوجی ویب سائٹ ‘دی ورج‘ کے حوالے سے بتایا کہ اوپن اے آئی اس وقت ایک نئے سوشل نیٹ ورک کے تصور پر ابتدائی سطح پر کام کر رہی ہے۔

 کمپنی کے سی ای او سام آلٹمین اس منصوبے کے حوالے سے مختلف افراد سے مشاورت میں مصروف ہیں۔

رپورٹ کے مطابق اوپن اے آئی نے نئے سوشل میڈیا پلیٹ فارم کا ایک ابتدائی خاکہ تیار کر لیا ہے، تاہم اس پر عمل درآمد کا حتمی فیصلہ تاحال نہیں کیا گیا۔

واٹس ایپ پر اے آئی آرٹ بنانے کا آسان طریقہ

میٹا اے آئی کے ذریعے تیار کردہ کچھ تصاویر غلط بھی ہو سکتی ہیں

 منصوبے سے منسلک ذرائع نے تصدیق کی ہے کہ یہ پلیٹ فارم انسٹاگرام اور ایکس (Twitter) جیسی خصوصیات کو یکجا کرے گا۔

فی الوقت کمپنی یا اس کے سربراہ سام آلٹمین کی جانب سے باقاعدہ طور پر کسی اعلان یا تصدیق سے گریز کیا جا رہا ہے، تاہم متعدد ٹیکنالوجی ماہرین کا ماننا ہے کہ یہ قدم ڈیجیٹل دنیا میں اوپن اے آئی کا نیا موڑ ہو سکتا ہے۔

یہ امر بھی قابلِ ذکر ہے کہ سام آلٹمین اور ایلون مسک کے درمیان مصنوعی ذہانت کے استعمال کے معاملے پر تنازعات چل رہے ہیں، اور دونوں فریقین ایک دوسرے پر ٹیکنالوجی کے غلط استعمال کے الزامات کے تحت قانونی چارہ جوئی بھی کر چکے ہیں۔

 علاوہ ازیں، سام آلٹمین اور مارک زکربرگ کے درمیان بھی اسی نوعیت کے اختلافات پائے جاتے ہیں۔