پاکستان کی جانب سے بھارتی فضائی جارحیت کا منہ توڑ جواب دیے جانے کے بعد سوشل میڈیا پلیٹ فارم ’ایکس‘ (سابقہ ٹوئٹر) پر پاکستانی صارفین نے ایک مرتبہ پھر اپنی تخلیقی صلاحیتوں کا بھرپور مظاہرہ کیا۔

پاکستانی ایئر فورس کی جانب سے بھارت کے پانچ جنگی طیاروں، تین ڈرونز اور ایک بریگیڈ ہیڈکوارٹر کو کامیابی سے نشانہ بنانے کے بعد نہ صرف بھارت کو دفاعی محاذ پر شدید نقصان اٹھانا پڑا بلکہ سوشل میڈیا پر بھی اسے پاکستانی صارفین کی جانب سے زبردست ردعمل کا سامنا ہے۔

جہاں بھارت میں اس کارروائی کے بعد تشویش اور بے یقینی کی فضا قائم ہے، وہیں پاکستانی صارفین نے ’پاکستان زندہ باد‘ اور ’سندور بن گیا تندور‘ جیسے ہیش ٹیگز کے ذریعے اپنی خوشی اور فخر کا اظہار کیا۔ ان ہیش ٹیگز نے دیکھتے ہی دیکھتے ٹاپ ٹرینڈز میں جگہ بنا لی، جب کہ طنز و مزاح سے بھرپور میمز نے بھی بھارتی صارفین کو زچ کر دیا۔

پاکستانی سوشل میڈیا صارفین کا یہ ردعمل نہ صرف قومی جذبے کی عکاسی کرتا ہے بلکہ یہ بھی ظاہر کرتا ہے کہ وہ صرف محاذِ جنگ پر ہی نہیں، میڈيا وار میں بھی کسی سے کم نہیں۔

بھارتی جارحیت کے جواب میں پاکستان کی مؤثر کارروائی کے بعد ایک سوشل میڈیا صارف نے تبصرہ کرتے ہوئے لکھا کہ بھارت نے رات کے اندھیرے میں حملے کا آغاز کیا، مگر جب پاکستان نے بھرپور جواب دیا تو بھارت کو پسپائی اختیار کرتے ہوئے سفید جھنڈا لہرانا پڑا۔

ایک میم میں ایک صارف نے فلم ‘کھٹا میٹھا‘ کی اکشے کمار والی کلپ کو استعمال کرتے ہوئے طنزیہ انداز میں دکھایا کہ فرانس، بھارت کی جانب سے حملے کی کوشش پر ناراض ہو کر اُسے سبق سکھانے کے لیے دوڑ رہا ہے۔

ایک صارف نے طنزیہ انداز اپناتے ہوئے نریندر مودی کو ‘شان ٹکڑے والا‘ بنا دیا، جو رافیل طیاروں کے پرزے سائیکل پر لاد کر فروخت کرنے نکلا ہے۔

ساتھ ہی یہ بھی تحریر کیا گیا کہ خبردار کیا تھا کہ ہم سے الجھنا مہنگا پڑے گا، اب انجام بھگتنا پڑے گا۔