پاکستان چھوڑ کر بھارت میں سکونت اختیار کرنے والے عدنان سمیع خان حالیہ پاک-بھارت کشیدگی کے دوران اپنی وفاداری ثابت کرنے کی کوشش میں سوشل میڈیا پر پاکستانی ٹی وی اینکرز کا مذاق اُڑاتے ہوئے خود تنقید کا نشانہ بن گئے۔

7 مئی کی صبح بھارتی افواج نے آزاد کشمیر اور پنجاب کے متعدد مقامات پر حملے کیے، جس کے نتیجے میں عام شہریوں کی شہادتیں ہوئیں اور عبادت گاہوں سمیت رہائشی مکانات کو نشانہ بنایا گیا۔

پاکستان نے بھرپور اور مؤثر جوابی کارروائی کرتے ہوئے دشمن کے 5 طیارے، ڈرون اور متعدد عسکری تنصیبات تباہ کیں، جس کے بعد بھارت نے لائن آف کنٹرول پر سفید جھنڈا لہرا کر پسپائی اختیار کی۔

اس تناظر میں بھارتی فلم انڈسٹری کی کئی ہندو شخصیات نے اپنی حکومت کے بیانیے کی تائید کی، جب کہ عدنان سمیع خان نے بھی بھارتی سوشل میڈیا صارفین کو متاثر کرنے کے لیے پاکستانی میڈیا کو طنز و تمسخر کا نشانہ بنایا۔

پاکستان واپسی کے سوال پر عدنان سمیع کی فواد چوہدری سے تلخ کلامی

عدنان سمیع نے فواد چوہدری کو 'جاہل' اور 'احمق' قرار دے دیا

 انہوں نے اپنے ایک ٹوئٹ میں ‘جے ہند‘ اور ‘آپریشن سندور‘ کے ہیش ٹیگ استعمال کیے، جب کہ ایک اور پوسٹ میں مصنوعی ذہانت سے تیار کردہ تصاویر شیئر کرتے ہوئے پاکستانی اینکرز کو بھارتی فوجیوں کے سامنے بے بس دکھایا۔

عدنان سمیع نے طنزیہ انداز میں لکھا کہ بھارتی حملے کے بعد پاکستانی اینکرز قوم کو تسلی دے رہے ہیں کہ ‘سب کچھ ٹھیک ہے‘۔

 ان کی اس حرکت پر سوشل میڈیا صارفین نے شدید ردعمل دیا اور ان پر طنز کیا کہ بھارتی شہریت کے لیے وہ کس حد تک جانے کو تیار ہیں۔

صارفین نے یہ بھی کہا کہ عدنان سمیع کی جانب سے پاکستان کے خلاف اس طرح کے بیانات محض بھارت میں مقام برقرار رکھنے کی ایک کوشش ہیں، جو بالآخر ان کی شخصیت کو متنازع اور غیر سنجیدہ بناتے جا رہے ہیں۔