پاکستان سپر لیگ (پی ایس ایل) کے دسویں سیزن کے بقیہ میچز کو یو اے ای منتقل کرنے کے اعلان کے بعد اب ٹورنامنٹ کو ملتوی کردیا گیا ہے۔

پی سی بی کی جانب سے جاری اعلامیے کے مطابق یہ فیصلہ وزیراعظم میاں محمد شہباز شریف کے مشورے پر کیا گیا ہے، جنہوں نے بھارت کی جانب سے بڑھتی ہوئی جارحیت کو مدنظر رکھتے ہوئے یہ رائے دی، اس وقت پوری قوم کی توجہ اور جذبات بجا طور پر ان بہادر مسلح افواج کی طرف ہیں جو پاکستان کی خودمختاری کا بھرپور دفاع کر رہی ہیں۔

پاک بھارت کشیدگی؛ PSL دبئی منتقل، IPL ملتوی

پی ایس ایل سیزن 10 کے بقیہ تمام میچز متحدہ عرب امارات منتقل کر دیے گئے

 اعلامیے میں کہا گیا ہے کہ گزشتہ 24 گھنٹوں کے دوران لائن آف کنٹرول (ایل او سی) کی صورتحال مزید خراب ہوئی ہے، 78 ڈرونز نے دراندازی کی ہے اور بھارت کی جانب سے زمین سے زمین پر مار کرنے والے میزائل داغے گئے ہیں۔

اعلامیے کے مطابق پی سی بی اور تمام کھلاڑی شہداء کے اہلِ خانہ اور مادرِ وطن کے دفاع میں مصروف سیکیورٹی اہلکاروں کے ساتھ مکمل یکجہتی کا اظہار کرتے ہیں۔

بیان میں کہا گیا کہ ’پی سی بی اپنے شراکت داروں، فرنچائزز، کھلاڑیوں، براڈکاسٹرز، سپانسرز اور منتظمین کی کاوشوں اور سپورٹ کو تسلیم کرتا ہے جنہوں نے اب تک ٹورنامنٹ کے کامیاب انعقاد کو یقینی بنایا، تاہم کرکٹ جو کہ ایک یکجہتی کی قوت اور خوشی کا ذریعہ ہے، اسے ایسے نازک وقت میں جب ملک کو ایک بے رحم چیلنج کا سامنا ہے، کچھ وقت کا وفقہ لینا چاہیے۔‘

پاک بھارت کشیدگی، ایشیا کپ 2025 ملتوی ہونے کا خدشہ

سنیل گواسکر نے ایشین کرکٹ کونسل تحلیل ہونے کا امکان ظاہر کردیا

پی سی بی کا پی ایس ایل میں شرکت کرنے والے غیرملکی کھلاڑیوں کا شکریہ ادا کرتے ہوئے کہنا تھا کہ ’ہم پی سی بی میں شریک کھلاڑیوں کی ذہنی صحت، غیرملکی کھلاڑیوں کے جذبات اور ان کے خاندانوں کی تشویش کا احترام کرتے ہیں جو اپنے پیاروں کو واپس گھر دیکھنا چاہتے ہیں۔‘

پی سی بی کے مطابق کرکٹ خوشی اور اتحاد کا ذریعہ ہے، تاہم اس وقت ایک وقفہ لینا چاہیے جب ملک ایسی سنگین صورتحال کا سامنا کر رہا ہو۔

 پی سی بی کے مطابق پاکستان سپر لیگ 10 کے نئے شیڈول کا اعلان بعد میں کیا جائے گا۔

 خیال رہے کہ گزشتہ روز پی سی بی نے پاکستان سپرلیگ کو پاکستان سے دبئی منتقل کرنے کا اعلان کیا تھا تاہم گزشتہ 24 گھنٹوں کی صورتحال پر لیگ کو ملتوی کرنے کا فیصلہ ہوا۔