سابق وزیر اعظم و بانی پی ٹی آئی عمران خان کے بیٹوں سلیمان خان اور قاسم خان کی اپنے والد کی رہائی کیلئے پاکستان پر عالمی دباؤ کی اپیل کے بعد انکے ماموں زیک گولڈ اسمتھ بھی بھانجوں کی حمایت میں میدان میں آگئے۔

عمران خان 190 ملین پاؤنڈ کرپشن کیس میں اگست 2023 سے اڈیالا جیل میں قید ہیں اور انسداد دہشت گردی ایکٹ کے تحت مقدمات سمیت متعدد مقدمات کا سامنا کر رہے ہیں۔

قاسم اور سلیمان نے انٹرویو میں کیا کہا؟

ایکس انفلوئنسر نوفل کے ساتھ ایک انٹرویو میں بات کرتے ہوئے عمران خان کے بیٹوں قاسم خان اور سلیمان خان نے انکشاف کیا کہ انہوں نے وہ تمام قانونی آپشنز سے تھک چکے ہیں اور اب عوام میں جانے کا فیصلہ کیا ہے کیونکہ ان کے مطابق صورتحال مزید خراب ہورہی ہے۔

انہوں نے کہا کہ کہ عمران خان کو وکلاء تک رسائی یا ان کے خاندان سے مسلسل رابطے کے بغیر قید تنہائی میں رکھا جاتا ہے اور کبھی کبھی مکمل اندھیرے میں رکھا جاتا ہے۔

قاسم نے کہا کہ 'ہم نے کبھی سوچا بھی نہیں تھا کہ وہ وہاں کتنے عرصے سے موجود ہیں اس کا ایک حصہ بھی ہوگا، اب صرف ایک راستہ رہ گیا ہے کہ وہ عوامی سطح پر بات کی جائے۔

قاسم اور سلیمان نے الزام لگایا کہ عمران خان کے بنیادی حقوق سے انکار کیا جا رہا ہے اور عدالتی حکم کے مطابق ہفتہ وار کالز کو اکثر نظر انداز کر دیا جاتا ہے، بعض اوقات وہ مہینوں تک اپنے والد سے بات کرنے سے قاصر رہتے ہیں۔

عمران خان کی رہائی کیلئے بیٹوں کی بین الاقوامی دباؤ کی اپیل

قاسم اور سلیمان نے اپنے والد کی اجازت سے پہلا انٹرویو دیا۔

قاسم نے مزید کہا کہ 'ہم ٹرمپ سے بات کرنا چاہتے ہیں یا کوئی ایسا طریقہ تلاش کرنا چاہتے ہیں جس میں وہ مدد کر سکتے ہیں'۔

انہوں نے مزید کہا کہ 'ہم اس وقت پاکستان پر بین الاقوامی دباؤ چاہتے ہیں، کیونکہ اس وقت وہ غیر انسانی حالات میں زندگی گزاررہے ہیں، وہ انہیں بنیادی انسانی حقوق نہیں دے رہے اور اب ہم عالمی دباؤ چاہتے ہیں'۔

قاسم نے کہا کہ وہ چاہتے ہیں کہ بین الاقوامی برادری دیکھے کہ کیا ہو رہا ہے اور امید ہے کہ کارروائی کرے اور ٹرمپ سے بہتر کون توجہ حاصل کرواسکتا ہے۔

زیک گولڈ اسمتھ نے کیا کہا؟

عمران خان کے بیٹوں کا انٹرویو سامنے آنے کے بعد انکی سابقہ اہلیہ جمائما گولڈسمتھ کے بھائی زیک گولڈ اسمتھ بھی بھانجوں کی حمایت میں میدان میں آگئے۔

زیک گولڈ اسمتھ نے اپنے 'ایکس' اکاؤنٹ پر لکھا کہ 'مجھے اپنے بھانجوں پر فخر ہے، انہوں نے کبھی بھی ذاتی تشہیر پر توجہ نہیں دی لیکن اب وہ اپنے والد عمران خان کے لیے بول پڑے ہیں'۔

انہوں نے لکھا کہ 'عمران خان پاکستان میں بہت سے لوگوں کے لیے ایک ہیرو اور کرپشن سے پاک لیڈر ہیں جو ایک بدمعاش، کرپٹ اور لالچی اسٹیبلشمنٹ کے ہاتھوں اذیت کا شکار ہیں'۔

یاد رہے کہ ماضی میں بھی زیک گولڈ اسمتھ متعدد بار عمران خان کیلئے عالمی برادری سے اپیل کرچکے ہیں۔

انہوں نے 'ایکس' پر اپنی ایک ٹوئٹ میں کہا تھا کہ 'پاکستانی اشرافیہ جانتی ہے اڈیالہ جیل میں قید بانی پی ٹی آئی عمران خان پاکستانی عوام کے پسندیدہ ترین لیڈر ہیں، یہ لوگ اقتدار سے چمٹے رہنے کیلئے کچھ بھی کریں گے اور اس وجہ سے عمران خان کے لئے صورتحال کافی خطر ناک ہوچکی ہے'۔

زیک گولڈ اسمتھ نے کہا تھا کہ ان عناصر کی کوئی بھی حرکت عمران خان اور پاکستان کے لئے خطرناک ہوسکتی ہے، اب وقت آچکا ہے کہ عالمی برادری بانی پی ٹی آئی کے لئے بھرپور آواز اٹھائے۔