بھارت کی پہلی مس گرینڈ انٹرنیشنل ریچل گپتا کے تاج کی واپسی کے بعد متعدد سوالات جنم لے رہے ہیں کہ آیا تاج ان سے واپس لیا گیا یا انہوں نے اختلافات کے باعث خود یہ قدم اٹھایا۔

 یہ تنازع ایک بار پھر عالمی بیوٹی پیجینٹس میں موجود دباؤ، سیاست اور استحصالی ماحول کو نمایاں کر رہا ہے۔

چند دن قبل تنظیم کی طرف سے یہ اعلان سامنے آیا تھا کہ ریچل کو ان کی ذمہ داریوں میں کوتاہی کے باعث ہٹایا گیا ہے۔

 ان پر بغیر اجازت پراجیکٹس میں شرکت اور ایک بین الاقوامی ٹرپ سے انکار کا الزام عائد کیا گیا لیکن ریچل کی کہانی اس سے مختلف ہے۔اپنے انسٹاگرام پیغام میں انہوں نے نہایت جذباتی انداز میں لکھا کہ مس گرینڈ انٹرنیشنل بننا میری زندگی کا سب سے خوبصورت خواب تھا۔ 

’میری پنجابی بہن‘ بھارتی ملکہِ حسن کا پاکستانی حسینہ کیلئے جذباتی نوٹ

بھارت میں آپ کے لیے ہمیشہ دروازے کھلے رہیں گے، ریچل گپتا

انہوں نے کہا کہ ‘جیسے جیسے وقت گزرا، میں نے دیکھا کہ وعدے پورے نہیں ہو رہے، ماحول زہریلا بنتا جا رہا ہے، اور میرے ساتھ جو سلوک ہو رہا ہے، وہ میرے خواب سے میل نہیں کھاتا۔ میں نے بہت برداشت کیا، لیکن اب مزید خاموش نہیں رہ سکتی۔‘

ریچل نے وعدہ کیا ہے کہ وہ جلد ایک تفصیلی ویڈیو جاری کریں گی، جس میں وہ اس تمام سفر، مشکلات اور اندرونی حقائق کو بے نقاب کریں گی۔

قابلِ ذکر بات یہ ہے کہ چند روز قبل ہی مس انگلینڈ 2025، میلا ماگی نے بھی مس ورلڈ انڈیا مقابلے کو تنقید کا نشانہ بنایا تھا، جہاں انہوں نے اسپانسرز کے استحصالی رویے اور شرکاء پر لباس کے حوالے سے دباؤ کی نشاندہی کی تھی۔

یہ تمام واقعات عالمی بیوٹی پیجینٹس میں شفافیت، اخلاقیات اور شرکاء کے تحفظ سے متعلق کئی سوالات کو جنم دے رہے ہیں، جن پر سنجیدہ غور و فکر کی ضرورت ہے۔