معروف شیف اور 'محفلِ رمضان' کی مہمان ماہ نور ملک نے اداکار دانش تیمور کے ‘فی الحال‘ والے بیان کے پس پردہ حقائق سے پردہ اٹھا دیا۔ 

ان کا کہنا ہے کہ یہ جملہ دانش تیمور کی روزمرہ کی گفتگو کا حصہ ہے، نہ کہ کوئی سوچ سمجھ کر دیا گیا بیان یا حکمت عملی۔

رمضان کے خصوصی پروگرام میں دانش تیمور کے اس جملے نے جہاں سوشل میڈیا پر کافی ہنگامہ کھڑا کیا، وہاں مداحوں اور ناظرین نے بھی اسے سخت تنقید کا نشانہ بنایا تھا۔

 تاہم ماہ نور ملک نے اپنے ایک حالیہ انٹرویو میں وضاحت کی کہ اصل میں یہ الفاظ دانش کی عادت ہیں اور انہیں اکثر بولتے سنا جاتا ہے۔

انہوں نے بتایا کہ ٹی وی پر جو چیزیں دکھائی جاتی ہیں، وہ مکمل سچائی نہیں ہوتیں، کیونکہ کئی بار باتوں کو ایڈیٹ کر کے پیش کیا جاتا ہے، جس سے اصل مطلب مختلف لگ سکتا ہے۔ 

عائزہ کے سامنے دانش تیمور 'فی الحال' بول کر پھنس گئے

چار شادیوں سے متعلق بیان پر دانش تیمور نے وضاحت دیدی

ماہ نور نے دانش تیمور کو ایک مہذب اور نیک انسان قرار دیتے ہوئے کہا کہ ‘فی الحال‘ کا لفظ ان کی گفتگو میں قدرتی طور پر آتا رہتا ہے اور اس کے پیچھے کوئی سازشی یا ارادی مقصد نہیں ہوتا۔

مزید کہا گیا کہ جب پروگرام میں یہ موضوع کافی دنوں سے زیر بحث تھا اور عائزہ کی موجودگی میں دوبارہ بات چیت شروع ہوئی، تو دانش نے بار بار یہی الفاظ دہرائے، جو کہ ان کی عادت کا حصہ تھا۔ 

ماہ نور ملک نے عائزہ کی خاموشی کو بھی سمجھداری اور حکمت عملی قرار دیا کیونکہ ان کا کوئی ردعمل ایک نئے تنازعے کو جنم دے سکتا تھا۔

مجموعی طور پر ماہ نور ملک کا یہ بیان دانش تیمور کے بیان کو بہتر سمجھنے اور سوشل میڈیا پر پھیلی غلط فہمیوں کو کم کرنے کی کوشش محسوس ہوتا ہے۔