اداکارہ اور ماڈل حنا رضوی نے حال ہی میں معروف بھارتی نغمہ نگار اور مصنف جاوید اختر کے حالیہ بیانات پر سخت تنقید کرتے ہوئے کہا ہے کہ جاوید اختر صاحب کو اب خاموشی اختیار کرنی چاہیے کیونکہ جب بھی وہ گفتگو کرتے ہیں، ان کے الفاظ میں نفرت اور تلخی نمایاں ہوتی ہے۔

یاد رہے کہ جاوید اختر نے ایک انٹرویو میں سینئر پاکستانی اداکارہ بشریٰ انصاری کے حوالے سے کہا تھا کہ بشریٰ انصاری مجھے خاموش رہنے کا مشورہ دیتی ہیں، لیکن وہ کون ہوتی ہیں مجھے ایسا کہنے والی؟

 جاوید اختر نے مزید کہا تھا کہ بھارت میں انہیں محض مسلمان ہونے کی بنیاد پر رہائش کے لیے گھر نہیں دیا جاتا اور اس صورتحال کے ذمہ دار وہ افراد ہیں جو تقسیمِ ہند کے وقت پاکستان سے بھارت ہجرت کر کے گئے تھے۔

'جاوید اختر انتخاب نہ بھی کریں تب بھی جہنم ہی جائیں گے'

انہیں جتنی عزت دی اس کے وہ حقدار نہیں تھے، عمران عباس

اس پر ردِعمل دیتے ہوئے حنا رضوی نے ایک ویڈیو پیغام میں کہا کہ وہ ایک ویڈیو دیکھ رہی تھیں جس میں جاوید اختر بشریٰ انصاری کے بیان کا ذکر کر رہے تھے۔ 

حنا رضوی نے تنقیدی انداز اپناتے ہوئے کہا کہ معاف کیجیے گا، کیا آپ جانتے ہیں بشریٰ انصاری کون ہیں؟ وہ پاکستان کی ایک نامور اور مایہ ناز فنکارہ ہیں، جنہوں نے اپنے فن اور شاندار کامیڈی سے لوگوں کے دل جیتے اور طویل عرصے تک ناظرین کو محظوظ کیا۔ پاکستانی عوام نہ صرف ان سے محبت کرتے ہیں بلکہ ان کا بے حد احترام بھی کرتے ہیں۔

انہوں نے مزید کہا کہ جاوید اختر صاحب، بشریٰ انصاری ایک معتبر اور باوقار فنکارہ ہیں، جن کے سامنے آپ کی باتوں کو کوئی اہمیت حاصل نہیں۔ ان کا یہ کہنا بالکل درست ہے کہ آپ کو خاموش رہنا چاہیے کیونکہ آپ کی گفتگو میں نفرت آمیز اور منفی جذبات جھلکتے ہیں۔

واضح رہے کہ اس سے قبل خود بشریٰ انصاری بھی جاوید اختر کے پاکستان مخالف بیانات پر سخت ردِعمل دے چکی ہیں۔

 ان کا کہنا تھا کہ جب آپ خدا پر یقین نہیں رکھتے اور پاکستان کے بارے میں منفی گفتگو کرتے ہیں تو کم از کم نصیرالدین شاہ کی طرح خاموش رہنے کا ہی سلیقہ اختیار کرلیں۔