معروف اداکارہ اریج محی الدین نے کہا ہے کہ قریبی رشتہ داروں، خصوصاً والدین اور نانی جیسے بزرگوں کی اہمیت کا اصل احساس ان کے دنیا سے رخصت ہونے کے بعد ہوتا ہے۔

ندا یاسر کے مارننگ شو میں گفتگو کرتے ہوئے اریج محی الدین نے کہا کہ اب عید کی خوشیاں ویسی نہیں رہیں جیسی بچپن اور ماضی میں ہوا کرتی تھیں، کیونکہ اب وہ چہرے آس پاس موجود نہیں جو ان لمحات کو خاص بناتے تھے۔

اداکارہ نے بتایا کہ وہ اپنی عیدیں اسلام آباد میں والدین اور نانی کے ساتھ گزارا کرتی تھیں، لیکن اب دونوں اس دنیا میں نہیں رہے، اور انہی کی کمی نے تہوار کی خوشیوں میں خاموشی سی بھر دی ہے۔

‘دنیا کی خوبصورت لڑکی ہے’، اریج محی الدین کی تعریفیں

میں سیونگ کرتی ہوں بڑے بڑے پلان ہیں

انہوں نے کہا کہ جب یہ پیارے رشتے ہمارے ساتھ ہوتے ہیں تو ہم ان کی موجودگی کو معمول کی بات سمجھتے ہیں، لیکن جب وہ ہمیشہ کے لیے رخصت ہو جائیں، تب ہمیں ان کی اہمیت کا گہرا ادراک ہوتا ہے۔

اریج محی الدین نے یہ بھی کہا کہ ماضی میں والد کی محبت بھری ضد پر وہ صبح سویرے عید کے لیے اٹھ کر تیار ہوتی تھیں، لیکن اب کوئی ایسا نہیں جو اُٹھنے کا کہے یا خوشیوں کا سبب بنے، یوں سب کچھ بدل چکا ہے۔

واضح رہے کہ اریج محی الدین نے متعدد مقبول ڈراموں میں اپنی اداکاری کا لوہا منوایا ہے جن میں قصہ مہربانو کا، میرے ہی رہنا اور قربتیں شامل ہیں۔ وہ سوشل میڈیا پر بھی فعال رہتی ہیں اور مداحوں کے ساتھ باقاعدگی سے تصاویر و ویڈیوز شیئر کرتی ہیں، جنہیں سراہا جاتا ہے۔