اداکارہ، ماڈل اور کاروباری شخصیت نادیہ حسین نے اپنے شوہر پر لگنے والے الزامات کے حوالے سے وضاحت کرتے ہوئے کہا ہے کہ الزامات کا مطلب جرم نہیں ہوتا، اور ان کے شوہر کو اس وقت تک مجرم نہیں قرار دیا جا سکتا جب تک عدالتی طور پر الزامات ثابت نہ ہو جائیں۔

ایک یوٹیوب چینل کے پوڈکاسٹ میں گفتگو کرتے ہوئے نادیہ حسین نے مختلف موضوعات پر کھل کر بات کی اور اپنے شوہر سے متعلق حالیہ تنازع پر بھی ردعمل دیا۔

 انہوں نے کہا کہ دنیا بھر میں کسی بھی شخص کو تبھی مجرم قرار دیا جاتا ہے جب اس کے خلاف ثبوتوں کی بنیاد پر عدالت فیصلہ سنائے، مگر بدقسمتی سے ہمارے معاشرے میں محض الزام لگنے پر ہی لوگوں کو مجرم سمجھ لیا جاتا ہے۔

نادیہ حسین کے شوہر کی درخواستِ ضمانت مسترد

فراڈ کیس، نادیہ حسین کے شوہر عاطف محمد خان کے گرد قانونی گھیرا تنگ

ان کا کہنا تھا کہ ان کے شوہر پر جو الزامات لگائے گئے ہیں وہ ابھی صرف الزامات کی حد تک ہیں، جنہیں عدالت میں ثابت کرنا ہوگا۔ یہ معاملہ عدالت اور جج کا ہے، لیکن یہاں سوشل میڈیا اور میڈیا بھی منصف بن کر فیصلے سنا دیتے ہیں، جو کسی طور مناسب رویہ نہیں۔

نادیہ حسین نے بتایا کہ ان کے شوہر کی ضمانت ہو چکی ہے، البتہ کچھ قانونی پیچیدگیاں ایسی تھیں جن کی وجہ سے کیس میں تاخیر ہوئی۔ انہوں نے مزید کہا کہ اس مشکل وقت میں بہت سی شخصیات کی اصل سوچ سامنے آئی ہے، جن سے ان کا تعلق صرف پیشہ ورانہ حد تک تھا، نہ کہ ذاتی یا خاندانی۔

اداکارہ کا کہنا تھا کہ وہ اس معاملے پر حد سے زیادہ گفتگو نہیں کر سکتیں کیونکہ کیس ابھی زیرِ تفتیش ہے، تاہم انہیں یقین ہے کہ مکمل تحقیقات کے بعد انصاف ضرور فراہم ہوگا۔

نادیہ حسین نے عدالتوں پر مکمل اعتماد کا اظہار کرتے ہوئے کہا کہ وقت کے ساتھ ساتھ اس کیس میں دیگر افراد کے نام بھی منظرِ عام پر آئیں گے، اور سچ سب کے سامنے آئے گا۔