بالی وڈ اور ہالی وڈ کی معروف اداکارہ پریانکا چوپڑا نے اپنے والد ڈاکٹر اشوک چوپڑا کی بارہویں برسی پر ایک جذباتی پیغام کے ذریعے انہیں خراجِ عقیدت پیش کردیا۔

اداکارہ نے انسٹاگرام اسٹوری پر بچپن کی ایک یادگار تصویر شیئر کی، جس میں وہ اپنے والد کے ساتھ خوشگوار لمحات گزارتی نظر آ رہی ہیں۔

پوسٹ کے ساتھ مختصر اور دل کو چھو لینے والا پیغام درج تھا 'ہر دن آپ کی یاد آتی ہے، پاپا'۔

یہ تصویر بظاہر کسی فیملی ٹرِپ کے دوران لی گئی تھی، جو پریانکا کے دل کے نہایت قریب ہے اور اپنے والد کے ساتھ گزارے گئے اُن خوشگوار لمحات کی عکاسی کرتے ہیں جو وقت کے ساتھ یادوں میں تبدیل ہو چکے ہیں۔

پریانکا کو کس فلم کی شوٹنگ کے دوران والد کی بیماری کا پتہ چلا؟

پریانکا کے ساتھی اداکار ارجن نے ان پر بیتا دکھ بیان کردیا

ڈاکٹر اشوک چوپڑا 2013 میں کینسر کے باعث انتقال کر گئے تھے، تب سے پریانکا بارہا مختلف انٹرویوز اور تقاریر میں والد کی موت کے دکھ اور اس کے اثرات پر کھل کر بات کر چکی ہیں۔

حال ہی میں ایک پوڈکاسٹ میں بات کرتے ہوئے انہوں نے کہا تھا کہ 'جب میرے والد کا انتقال ہوا تو میں نے آہستہ آہستہ یہ سیکھا کہ یہ درد کبھی ختم نہیں ہوگا، یہ ایک ساتھی بن جاتا ہے، اگر آپ یہ سوچ رہے ہیں کہ ایک دن ایسا آئے گا جب یہ کم ہو جائے گا، یا بالکل ختم ہو جائے گا، تو ایسا کبھی نہیں ہوتا، یہ آپ کی زندگی کا حصہ بن جاتا ہے'۔

انہوں نے مزید کہا کہ 'کبھی کبھار یہ دکھ شدت سے سامنے آتا ہے، جیسے کسی عشائیے پر مہمان بن کر آ جائے، یا ایک ہفتے تک ساتھ رہنے لگے اور کبھی ایسا وقت آتا ہے کہ آپ اسے بھول جاتے ہیں، جب تک کہ کوئی تصویر نہ دیکھ لیں اور ایک آہ نہ بھر دیں، ہر قسم کا غم وقت کے ساتھ آپ کا ساتھی بن جاتا ہے، اور ہمیں اسے قبول کرنا سیکھنا ہوتا ہے'۔

پریانکا چوپڑا کا اپنے والد کے انتقال کے بعد جذباتی قدم

والدہ مدھو چوپڑا نے بتادیا

پریانکا چوپڑا کی یہ باتیں اُن لاکھوں مداحوں کے دلوں کو چھو گئیں جو ذاتی طور پر کسی قریبی عزیز کے بچھڑنے کا صدمہ جھیل چکے ہیں۔

پریانکا اس وقت متعدد بڑے بین الاقوامی پروجیکٹس پر کام کر رہی ہیں، ان کی اگلی فلم 'ہیڈز آف اسٹیٹ (Heads of State)' ہے، جو ایک ایکشن تھرلر ہے۔

اس فلم میں وہ مشہور ریسلر اور اداکار جان سینا اور ہالی وڈ اسٹار ادریس ایلبا کے ساتھ مرکزی کردار میں نظر آئیں گی، فلم 2 جولائی کو پرائم ویڈیو پر ریلیز ہوگی۔