منیلا میں قائم پاکستانی سفارتخانے نے اعلان کیا ہے کہ پاکستانی طلبہ کی ایک ٹیم نے 2025 ایشیا پیسفک (APAC) سلوشن چیلنج میں نمایاں اعزاز حاصل کیا ہے۔ یہ عالمی سطح پر معروف ٹیکنالوجی مقابلہ گوگل اور ایشیائی ترقیاتی بینک (ADB) کے اشتراک سے منعقد کیا جاتا ہے۔

اس مقابلے میں ایشیا پیسفک کے 12 ممالک سے 750 سے زائد ٹیموں نے حصہ لیا، جن میں سے پاکستان کی انسٹیٹیوٹ آف اسپیس ٹیکنالوجی (IST) اسلام آباد سے تعلق رکھنے والی ٹیم GeoGemma نے "بہترین مصنوعی ذہانت کے استعمال کا ایوارڈ" اپنے نام کیا۔ ٹاپ 10 فائنلسٹ ٹیموں میں جنوبی کوریا، جاپان، سنگاپور، فلپائن اور انڈونیشیا کی ٹیمیں بھی شامل تھیں۔

GeoGemma کی انقلابی تجویز سیٹلائٹ امیجری اور مصنوعی ذہانت کا استعمال کرتے ہوئے Gemini API کے ذریعے قدرتی آفات کے خطرے سے دوچار علاقوں کے لیے ابتدائی وارننگ اور خطرے کی تشخیص فراہم کرتی ہے۔ اس سسٹم کو انسانی جانیں بچانے کی حقیقی صلاحیت حاصل ہے۔

اے آئی سسٹمز کے انسانی کنٹرول سے باہر ہونے کا خطرہ

ٹیکنالوجی کے تخلیق کار نے انتباہ دے دیا۔

اس باصلاحیت ٹیم میں احمد اقبال، حنزلہ بن یونس، خلیل الرحمان اور عبداللہ آصف شامل تھے، جنہیں قدرتی آفات سے بچاؤ کے لیے جیو اسپیشل ٹیکنالوجی کے مؤثر استعمال پر سراہا گیا۔

اس کے علاوہ، پاکستان کی ایک اور ٹیم i+1، جو NUCES-FAST سے تعلق رکھتی ہے، بھی ٹاپ 10 فائنلسٹ میں شامل ہوئی۔ ان کی تخلیق کردہ AI سے چلنے والی ڈاکیومنٹ کلاسیفائر بھی Gemini ٹولز کی مدد سے تیار کی گئی، جو ذہنی طور پر مختلف افراد کے لیے پیچیدہ معلومات کو زیادہ قابلِ فہم بناتی ہے، اور شمولیت اور علم تک رسائی کو فروغ دیتی ہے۔

ان کامیابیوں کے اعتراف میں فلپائن میں پاکستان کی سفیر ڈاکٹر آسیما ربانی نے دونوں ٹیموں کے اعزاز میں اپنی رہائش گاہ پر تقریب منعقد کی۔ انہوں نے طلبہ، ان کے اساتذہ، متعلقہ اداروں اور مقابلے کے منتظمین کے کردار کو سراہتے ہوئے کہا کہ یہ کامیابیاں پاکستان کی عالمی سطح پر ابھرتی ہوئی AI اور جدید ٹیکنالوجی کی صلاحیتوں کی عکاس ہیں۔