میٹا نے واٹس ایپ بزنس استعمال کرنے والے کاروباری اداروں کے لیے کئی نئے اور جدید فیچرز متعارف کروائے ہیں، جن میں وائس کالنگ، مصنوعی ذہانت (AI) سے چلنے والی خودکار گفتگو اور مصنوعات کی تجویز کا نظام شامل ہے۔ یہ تمام فیچرز کاروباری رابطوں کو مزید مؤثر، تیز اور صارف دوست بنانے کی جانب ایک اہم پیش رفت تصور کیے جا رہے ہیں۔

ٹیکنالوجی ویب سائٹس کے مطابق، ان فیچرز کا باضابطہ اعلان میامی میں ہونے والی سالانہ تقریب ’Conversations 2025‘ کے دوران کیا گیا، جہاں میٹا نے واٹس ایپ بزنس پلیٹ فارم میں دو بڑے اور انقلابی اپڈیٹس پیش کیے۔

ان میں پہلا فیچر وائس کال بیک کا ہے، جس کے تحت بڑی کمپنیاں واٹس ایپ بزنس API کے ذریعے اپنے صارفین کو خود سے کال بیک کر سکیں گی۔ اس سے پہلے صرف صارف کال کرتے تھے، مگر اب کمپنیاں جواب میں براہ راست کال کر سکیں گی۔ مزید برآں، بزنس پیغامات میں وائس نوٹس شامل کرنے کی سہولت بھی دی جا رہی ہے، جو کہ خاص طور پر صحت، مالیات اور ٹریول انڈسٹریز کے لیے انتہائی مؤثر ثابت ہوگی۔

واٹس ایپ پر ذاتی اے آئی چیٹ بوٹس بنانے کا فیچر متعارف

یہ چیٹ بوٹس صارف کی مقرر کردہ ترجیحات کے مطابق کام کریں گے

دوسرا بڑا فیچر مصنوعی ذہانت پر مبنی وائس ایجنٹس کا ہے، جنہیں Qual, Alan Labs, Voicy اور Phonic جیسے پارٹنرز کے ذریعے ترتیب دیا جا سکے گا۔ یہ وائس ایجنٹس خودکار انداز میں صارفین سے گفتگو کر کے معلومات فراہم کریں گے یا خریداری میں رہنمائی کریں گے۔

اس کے ساتھ ساتھ، واٹس ایپ پر مصنوعاتی سفارشات کا AI سسٹم بھی شامل کیا جا رہا ہے، جو صارف کی دلچسپی اور خریداری کے رویے کی بنیاد پر موزوں مصنوعات تجویز کرے گا، اور صارفین واٹس ایپ پر ہی خریداری مکمل کر سکیں گے۔

میٹا نے ایڈز مینیجر میں بھی نمایاں بہتری لائی ہے، جس کے تحت کمپنیاں واٹس ایپ، فیس بک اور انسٹاگرام پر ایک ہی جگہ سے اپنی تشہیری مہمات (campaigns) منظم اور نشر کر سکیں گی۔ اس کے علاوہ، AI خودکار طور پر مہمات کا بجٹ اور نوعیت بھی مؤثر انداز میں ترتیب دے گا، تاکہ کاروبار کو بہترین نتائج مل سکیں۔

میٹا کی یہ پیش رفت واٹس ایپ بزنس کو ایک سادہ پیغام رسانی کی ایپ سے بڑھا کر مکمل کاروباری رابطوں اور صارف خدمات کا مرکز بنا دیتی ہے، جہاں وائس کالز، AI چیٹ بوٹس، پرسنلائزڈ پروڈکٹ ریکمنڈیشنز اور مارکیٹنگ سب کچھ ایک ہی پلیٹ فارم پر دستیاب ہے۔