قومی کرکٹ ٹیم کے سابق نائب کپتان اور آل راؤنڈر شاداب خان نے کندھے کی سرجری کے بعد اپنی ہیلتھ اپڈیٹ سے فینز کو آگاہ کردیا۔

حال ہی میں شاداب خان نے فوٹو اینڈ ویڈیو شیئرنگ ایپ انسٹاگرام پر پوسٹ شیئر کی جس میں انہیں اسپتال میں موجود  مسکراتے ہوئے تھمب پوز دیتے دیکھا گیا جبکہ انکے ایک ہاتھ پر پٹی بندھی ہوئی ہے۔

اپنی تصویر کیساتھ کرکٹر نے کیپشن میں اپنے فینز کو بتایا کہ،‘الحمدللہ! سرجری کامیابی سے مکمل ہو گئی ہے۔ اب صحت یابی اور ریہیب (بحالی) کا مرحلہ باقی ہے۔‘

شاداب خان نے فینز سے دعاؤں کی درخواست کرتے ہوئے مزید لکھا کہ،‘ آپ سب سے دعا کی درخواست ہے، مجھے اپنی دعاؤں میں یاد رکھیں۔

یاد رہے کہ شاداب خان کو ٹھیک ہونے میں تقریباً 12 ہفتے لگ سکتے ہیں، جسکے باعث بنگلا دیش اور ویسٹ انڈیز کے خلاف سیریز میں وہ حصہ نہیں لے سکیں گے جبکہ ایشیا کپ میں بھی شرکت مشکوک ہے۔

اس حوالے سے پاکستان کرکٹ بورڈ کے ترجمان کا کہنا ہے کہ شاداب خان کو سرجری کے بعد آرام کی ضرورت ہے امید ہے کہ وہ ایشیاء کپ سے قبل مکمل فٹ ہوجائیں گے۔

شاداب خان کی اہلیہ کے ہمراہ روضہ رسولﷺ پر حاضری

شادی کی سالگرہ پر شاداب خان کا اہلیہ کیلئے بڑا سرپرائز

بتایا گیا ہے کہ شاداب کو گزشتہ کچھ عرصے سے کندھے میں تکلیف کا سامنا تھا جس سے انھیں گیند تھرو کرنے میں دشواری ہوتی تھی، معاملہ اس وقت سنگین رخ اختیار کر گیا جب بنگلا دیش سے سیریز میں گگلی کرتے ہوئے بھی وہ مشکلات محسوس کرنے لگے، جب وہ تعطیلات گزارنے انگلینڈ گئے تو وہاں ایم آر آئی اسکین سے انجری کی سنگینی کا علم ہوا، ڈاکٹر نے انھیں فوری طور پر سرجری کرانے کا مشورہ دیا تھا۔

یہاں یہ بات بھی قابل ذکر ہے کہ  شاداب خان اب تک 6 ٹیسٹ، 70 ون ڈے انٹرنیشنل اور 112 ٹی ٹوئنٹی انٹرنیشنل میچز میں پاکستان کی نمائندگی کر چکے ہیں۔ اس دوران انہوں نے 1947 رنز بنائے جبکہ 211 وکٹیں بھی حاصل کیں۔