’دھورندھر‘ فلم کا ٹریلر سامنے آتے ہی دیکھنے والوں کی سانسیں پھول گئیں کیونکہ فلم میں ایک طرف ایکشن سینز کی بھرمار ہے تو دوسری طرف ایک مضبوط کاسٹ بھی ہے۔

فلم میں رنویر سنگھ، سنجے دت ، ارجن رام پال، اکشے کھنہ اور آر مادھون جیسی سپر کاسٹ موجود ہے۔

فلم کا ٹریلر نہایت شاندار رہا اور اس میں رنویر سنگھ کا غلبہ رہا تاہم فلم کے دیگر اداکاروں کی انٹری بھی دبنگ انداز میں کروائی گئی لیکن جب فلم میں سنجے دت کی انٹری ہوئی تو ان کا حلیہ کچھ شناسا سا لگا اور دیکھنے والے اس حلیے کے حامل شخص کو پہچاننے کے لیے تُکے لگانے لگے۔

تاہم اکثریت کا خیال ہے کہ سنجے دت نے اس فلم میں پاکستان کے مشہور پولیس افسر اسلم چوہدری کا کردار نبھایا ہے۔

چونکہ ’دھورندھر‘ فلم کی کہانی کا مکمل پلاٹ سامنے نہیں آیا ہے لیکن فلم کے بارے میں بتایا جارہا ہے کہ یہ ایک بھارتی جاسوس کی کہانی ہے جو پاکستان جاتا ہے اور وہاں اس کا مقابلہ مختلف لوگوں سے ہوتا ہے۔

جہاں تک شہید پولیس افسر اسلم چوہدری کی بات کی جائے تو ان کی پہچان ایک نڈر اور بہادر پولیس افسر کی تھی، ان کا لباس ہمیشہ سے ہی سفید کاٹن کا سوٹ رہا ہے اور وہ پولیس وردی میں بہت کم نظر آئے ہیں۔

رنویر سنگھ کی ’دھورندھر‘ کے ٹریلر نے تباہی مچا دی

فلم 5 دسمبر 2025 کو ریلیز ہوگی

ملک دشمنوں کا مقابلہ کرنے میں اسلم چوہدری کی خدمات ناقابل فراموش ہیں، ان پر پاکستان میں بھی ’چوہدری ‘ نامی فلم بنائی جاچکی ہے۔

2012 میں وہ ایک خودکش حملے میں شہید ہوگئے لیکن آج بھی ان کو پاکستان کے سب سے زیادہ مقبول پولیس افسر میں شمار کیا جاتا ہے۔

سنجے دت نے اسلم چوہدری کا کردار کس نوعیت کا نبھایا ہے وہ تو فلم دیکھ کر ہی معلوم ہوگا لیکن فلم میں ان کا گیٹ اپ دیکھ کر یہی گمان ہوتا ہے کہ انہوں نے اسلم چوہدری کے اسٹائل کو کاپی کرنے کی کوشش کی ہے۔

یہ فلم ناظرین 5 دسمبر 2025 کو دیکھ سکیں گے۔