میٹا نے فیس بک رِیلز استعمال کرنے والے صارفین کے لیے ایک نیا اور مفید فیچر متعارف کرایا ہے، جس کے تحت اب ویڈیو اپ لوڈ کرنے سے پہلے اس میں موجود مواد کی کاپی رائٹ خلاف ورزی کی جانچ کی جا سکے گی۔

ٹیکنالوجی ویب سائٹس کے مطابق، میٹا جو فیس بک، انسٹاگرام اور واٹس ایپ کی مالک کمپنی ہے نے یہ فیچر تمام کانٹینٹ کریئیٹرز کے لیے دستیاب کر دیا ہے۔ پہلے یہ سہولت صرف میٹا بزنس سوٹ میں دستیاب تھی، لیکن اب اسے فیس بک رِیلز کمپوزر میں بھی شامل کر لیا گیا ہے۔

اس نئے فیچر کے ذریعے کریئیٹرز کو اپنی ویڈیوز پوسٹ کرنے سے قبل یہ معلوم ہو سکے گا کہ آیا ان کی ویڈیو میں استعمال ہونے والا آڈیو یا ویژول مواد کسی دوسرے کے کاپی رائٹ کے تحت تو نہیں آتا۔ اگر ایسا مواد پایا گیا تو صارف کو اپ لوڈ سے قبل الرٹ کر دیا جائے گا اور اسے متنازعہ مواد کو ہٹانے یا ایڈیٹ کرنے کا موقع دیا جائے گا۔

میٹا کا نیا ڈیجیٹل گارڈ متعارف

کمپنی اب تک اپنے پرائیویسی پروگرام میں 8 ارب ڈالر سے زائد کی سرمایہ کاری کر چکی ہے

میٹا کا کہنا ہے کہ اگر کسی ویڈیو میں ممکنہ خلاف ورزی کا شبہ ہو تو اس کی اشاعت میں ایک گھنٹے تک تاخیر کی جا سکتی ہے، تاکہ کریئیٹر متبادل آڈیو یا ویژول شامل کر سکے۔

یہ فیچر صارف کی ضرورت کے مطابق آن یا آف بھی کیا جا سکتا ہے، تاہم اگر کوئی صارف اسے غیر فعال رکھ کر ویڈیو اپ لوڈ کرے تو بھی سسٹم خودکار طور پر ویڈیو کا جائزہ لیتا رہے گا۔ 

خلاف ورزی کی صورت میں ویڈیو کو مکمل یا جزوی طور پر بلاک کیا جا سکتا ہے، آڈیو کو خاموش کیا جا سکتا ہے یا اس کی رسائی محدود کر دی جا سکتی ہے۔

میٹا کے مطابق اس اقدام کا مقصد کانٹینٹ کریئیٹرز کو ممکنہ قانونی پیچیدگیوں سے محفوظ رکھنا اور ان کے مواد کی رسائی اور آمدنی پر منفی اثرات سے بچانا ہے۔