گزشتہ دہائی کے دوران 6 سے 12 سال کی عمر کے بچوں میں نزدیک بینی (Myopia) کے کیسز میں نمایاں اضافہ دیکھنے میں آیا ہے۔ اس کا ایک اہم سبب یہ ہے کہ بچے تقریباً چھ سال کی عمر میں اسکول جانا شروع کرتے ہیں اور اسی عمر میں انہیں بورڈ پر لکھا مواد دیکھنے میں دشواری پیش آتی ہے، خاص طور پر جب وہ کلاس روم میں پچھلی نشستوں پر بیٹھے ہوں۔

خوش آئند بات یہ ہے کہ اب والدین اور اساتذہ بصارت کے مسائل سے زیادہ باخبر ہیں۔ ان کی بروقت توجہ اور اقدام کے باعث اس مرض کی ابتدائی تشخیص اور علاج پہلے کے مقابلے میں کہیں زیادہ بہتر انداز میں ممکن ہو رہا ہے۔ چونکہ نزدیک بینی کی جلد شناخت سے اس کا مؤثر علاج ممکن ہے، اس لیے یہ شعور انتہائی اہمیت کا حامل ہے۔

وہ بچے جن کے خاندان میں چشمہ پہننے کی ہسٹری ہو، انہیں خاص طور پر باقاعدہ نظر کے معائنے کروانے چاہییں تاکہ کسی بھی ممکنہ مسئلے کی بروقت تشخیص کی جا سکے۔ اگر علاج میں تاخیر ہو تو نہ صرف نظر کمزور ہو سکتی ہے بلکہ پیچیدگیاں بھی پیدا ہو سکتی ہیں۔

کن مہینوں میں پیدا ہونے والے بچے زیادہ ذہین ہوتے ہیں؟

ماہرین نے 500 اسپتالوں کا ڈیٹا اکھٹا کرکے دلچسپ نتائج اخذ کیے

خوش قسمتی سے جدید دور میں نزدیک بینی کو بڑھنے سے روکنے کے لیے کئی مؤثر طریقے موجود ہیں، جیسے کہ کم شدت والے قطرے (low-dose atropine drops) اور میوپیا کنٹرول شیشے (Myopia Control Lenses) جو بچوں کی نظر کی حالت کو بہتر بنانے اور اسے مزید خراب ہونے سے روکنے میں مددگار ہیں۔

اسکولوں اور والدین کے لیے ضروری ہے کہ وہ بچوں میں نظر کی صحت کے بارے میں آگاہی پیدا کریں۔ اسکرین ٹائم محدود کرنا، بڑی اسکرینز کا استعمال، جسمانی سرگرمیوں کی حوصلہ افزائی، اور آنکھوں کے باقاعدہ معائنے جیسی احتیاطی تدابیر بچوں کی بصارت کو محفوظ بنانے میں اہم کردار ادا کر سکتی ہیں۔

اگر یہ عادات اپنائی جائیں تو نہ صرف بچوں کی بصارت کو بہتر رکھا جا سکتا ہے بلکہ ان کی تعلیمی کارکردگی اور مجموعی صحت میں بھی بہتری ممکن ہے۔