امریکی صدر ڈونلڈ ٹرمپ کی جانب سے رواں برس ستمبر میں پاکستان کا دورہ کیے جانے کا امکان ہے۔

مقامی میڈیا میں اس پیش رفت سے واقف ذرائع کے حوالے سے سامنے آنے والی رپورٹس میں ٹرمپ کے دورہ پاکستان کی خبر رپورٹ کی گئی۔

اگر اس دورے کی تصدیق ہوجاتی ہے تو یہ تقریباً 2 دہائی کے طویل عرصے میں کسی بھی امریکی صدر کا پہلا دورہ پاکستان ہوگا۔

ٹرمپ کی نظریں اب پاکستان کے معدنیاتی ذخائر پر

امریکی عہدیدار نے وزیراعظم شہباز شریف کو امریکی دلچسپی سے آگاہ کیا۔

سینئر پاکستانی صحافی اعزاز سید نے بھی مائیکرو بلاگنگ پلیٹ فارم ایکس پر خبر دیتے ہوئے کہا تھا کہ ٹرمپ 18 ستمبر کو پاکستان کا دورہ کریں گے۔

تاہم ٹرمپ کے دورہ پاکستان کی خبروں کو بھارتی میڈیا نے فیک نیوز قرار دے کر دعویٰ کیا ہے کہ امریکی صدر 17 سے 19 ستمبر تک شاہ چارلس کی دعوت پر برطانیہ کا دورہ کریں گے جن کی میزبانی ونڈسر کاسل میں کی جائے گی۔

چنانچہ ایک اور پوسٹ میں تصحیح کرتے ہوئے اعزاز سید نے اپڈیٹ کیا کہ ٹرمپ پاکستان کا دورہ کریں گے لیکن تاریخ کو ابھی فائنل نہیں کیا گیا اور اس پر بات چیت جاری ہے اور چونکہ اس حوالے سے سیکیورٹی خدشات کا پہلو بھی موجود ہے اس لیے دورے کی تاریخ کا اعلان آخری لمحات میں کیا جائے گا۔

آخری مرتبہ سال 2006 میں اس وقت کے امریکی صدر جارج ڈبلیو بش پاکستان کے 2 روزہ دورے پر اسلام آباد آئے تھے، اس کے بعد امریکی صدر پڑوسی ملک بھارت کا تواتر سے دورہ کرتے رہے لیکن پاکستان نہیں آئے۔

دوسری جانب جب اس بارے میں پاکستان کے دفتر خارجہ سے سوال کیا گیا تو ترجمان دفتر خارجہ نے ٹرمپ کے متوقع دورہ پاکستان سے متعلق لاعلمی کا اظہار کیا۔