کہتے ہیں کہ جس طرح  کسی بھی فنکار کیلئے کوئی سرحد نہیں ہوتی ، ایسے ہی موسیقی بھی سرحدوں کی محتاج نہیں، اور اس بات کو بھارت کے قابل فخر پنجابی گلوکار دلجیت دوسانجھ نے ثابت کردیا۔

ہر فن مولا کے لقب سے مشہور دلجیت وہ شخصیت ہیں جو نہ صرف اداکاری میں ماہر ہیں بلکہ موسیقی کی دنیا میں بھی انکا کوئی ہم پلہ نہیں، کئی سپر ہٹ گانے دینے والے دلجیت  نے نہ صرف پنجابی زبان کو عالمی سطح پر باعث فخر بنایا بلکہ مختلف شعبوں میں اپنی صلاحیتوں کا مظاہرہ کیا، اداکاری کا میدان ہو یا پھر میوزک کی دنیا دلجیت نے ہر شعبے میں اپنے فن کا لوہا منوایا ہے۔

دلجیت دوسانجھ: گاؤں کے لڑکے سے عالمی ستارے تک کا سفر

یہ وہ شخص ہیں جو پنجابی بولتے ہیں تو دنیا ہمہ تن گوش ہو کر سنتی ہے۔

یہی وجہ ہے کہ وہی گاؤں کا عام سا لڑکا جسے کوئی نہیں جانتا تھا آج دنیا اسکی دیوانی ہے اور اسے اپنا آئیڈیل مانتی ہے۔

لیکن خود دلجیت کس شخصیت کے دیوانے ہیں یہ انہوں نے اپنی حالیہ پوسٹ سے واضح کرکے سب کو دنگ کردیا۔

حال ہی میں دلجیت دوسانجھ نے فوٹو اینڈ ویڈیو شیئرنگ ایپ انسٹاگرام پر پوسٹ شیئر کی جس میں انہیں گاؤں کی سیر کرتے ، ٹیوب ویل سے پانی پیتے اور گاؤں کی سادگی کو انجوائے کرتے دیکھا جاسکتا ہے۔

لیکن جو چیز سب کی توجہ کا مرکز بنی وہ اس کلپ سے جڑا ساؤنڈ ٹریک ’راوی’  تھا جو  کسی اور کا نہیں بلکہ پاکستانی گلوکار سجاد علی کا شاہکار تھا۔

اس ویڈیو  میں  بھارتی سپر اسٹار دلجیت  کو سجاد علی کے مشہور اور دل کو چھو لینے والے گانے "راوی" پر جھومتے دیکھا گیا، جس پر دونوں ممالک کے مداحوں نے بھرپور داد دی۔

کیونکہ ایک جانب جہاں انکی ہانیہ عامر کیساتھ فلم ’سردار جی 3’ میں بھارت و پاکستان کے فنکاروں کے اس تعاون پر اعتراضات اٹھائے گئے لیکن دلجیت اپنے اسی مؤقف پر ڈٹے رہے کہ جب فلم کی شوٹنگ ہوئی، تب سب کچھ معمول پر تھا، تو اب یہ شور کیسا؟’

اور اب ایک بار پھر انکی پاکستانی فنکاروں سے محبت اور موسیقی سے لگاؤ لوگوں کے دل موہ لے گیا۔