ترکیہ کی ریاست دیار بقر میں دل دہلا دینے والا واقع پیش آیا جہاں لڑکی کے انکار کرنے پر معشوق نے عین شادی کے وقت لڑکی کے دولہا پر گولیاں برسا دیں۔

سماجی رابطے کی ویب سائٹ ایکس پر ایک دلخراش اور ہولناک ویڈیو گردش کررہی ہے جس میں شادی حال میں شادی کی رونق کے درمیان صفِ ماتم بچھ گئی۔

سی سی ٹی وی کیمرے سے حاصل ہونے والی المناک ویڈیو میں دیکھا جاسکتا ہے کہ سفید شرٹ میں ملبوس نوجوان شادی حال میں داخل ہوتا ہے اور دیکھتے ہی دیکھتے دولہا پر گولیوں سے وار کرکے فرار ہوجاتا ہے۔

تفصیلات کے مطابق ملزم دلہن سے شادی کرنا چاہتا تھا جس نے یہ درخواست قبول نہیں کی اور کسی اور سے شادی کرلی، دلبرداشتہ ہوکر ملزم نے شادی میں پہنچ کر دولہے کو گولی مار دی جس کے نتیجے میں دولہے کے ساتھ موجود ایک بچے کو بھی چوٹ آئی۔

 دولہا کو شدید زخمی حالت میں ہسپتال لے جایا گیا۔

غیر ملکی میڈیا آؤٹ لیٹس پر شائع ہونے والی ویڈیو میں اس حملہ آور کی  مکمل تفصیلات دیکھی جاسکتی ہیں جنہیں سی سی ٹی وی کیمروں نے محفوظ کر لیا۔

دولہے کو علاج کے لیے فوری طور پر نجی اسپتال منتقل کیا گیا اور پولیس نے ملزم کو گرفتار کر کے واقعے کی تحقیقات کا آغاز کردیا۔