انفوٹینمنٹ

فیصل قریشی کی سالگرہ، بچوں کی شرارت نے سماں باندھ دیا

Web Desk

2 years ago

فیصل قریشی کی سالگرہ، بچوں کی شرارت نے سماں باندھ دیا

پاکستانی اداکار فیصل قریشی کی 50ویں سالگرہ کے موقع پر ان کی اہلیہ ثناء فیصل نے شوہر اور بچوں کی کیک کاٹتے ہوئے شرارت سے بھرپور ویڈیو جاری کردی۔

گزشتہ روز فیصل قریشی کی اہلیہ نے فوٹو اینڈ ویڈیو شیئرنگ ایپ انسٹاگرام پر ایک ویڈیو جاری کی جس میں انہیں اپنے بیٹا اور بیٹی کے ساتھ مل کر فیصل قریشی کی سالگرہ مناتے دیکھا جاسکتا ہے۔

ڈرامہ ’قلبِ مومن‘ میں اپنی بہترین اداکاری کے جوہر دکھانے والے اداکار فیصل قریشی کی سالگرہ پر ان کے بیوی بچوں نے کسی مہنگے ریسٹورنٹ میں جشن منانے کے بجائے اپنے گھر میں سادہ سی پارٹی کا انعقاد کیا۔

ویڈیو میں دیکھا جاسکتا ہے کہ فیصل قریشی کے سامنے موجود میز پر ایک چاکلیٹ کیک رکھا ہوا ہے جبکہ اس کے ساتھ ہی بچوں کے ہاتھ سے بنائے ہوئے سالگرہ کی مبارکباد والے کارڈ رکھے ہیں۔

مذکورہ ویڈیو میں یہ بھی دیکھا گیا کہ جیسے ہی فیصل قریشی اپنے بچوں کے ساتھ مل کر کیک کاٹتے ہیں تو پہلے ان کی بیٹی اور پھر ان کا بیٹا کیک کھا لیتے ہیں جبکہ فیصل قریشی اپنی باری کا انتظار ہی کرتے رہ جاتے ہیں لیکن پھر ان کی اہلیہ چمچ سے برتھ ڈے بوائے کو بھی کیک کھلا دیتی ہیں۔

بعدازاں فیصل قریشی سمیت گھر کے تینوں افراد کیک سے لطف اندوز ہوتے بھی نظر آئے جبکہ ان کا بیٹا ٹیبل پر بیٹھ کر چمچ سے کیک کھاتا رہا۔

سوشل میڈیا پر اس ویڈیو کو بے حد پسند کیا جارہا ہے اور صارفین فیصل قریشی کی سالگرہ پر فضول خرچی کے بجائے سادگی اختیار کرنے کو بھی خوب سراہتے نظر آرہے ہیں۔