گوگل کے سابق سی ای او ایرک شمٹ اور ان کی اہلیہ وینڈی نے اپنی پُرتعیش حویلی ساڑھے 24 ملین ڈالر میں فروخت کے لیے پیش کردی جوکہ تقریباً 6 ارب 80 کروڑ 48 لاکھ 94 ہزار پاکستانی روپے بنتے ہیں۔

69 سالہ ایرک شمٹ کے اثاثوں کی مجموعی مالیت اس وقت تقریباً 23.9 ارب ڈالر ہے، وہ گزشتہ کئی دہائیوں سے اس حویلی میں رہائش پذیر ہیں۔

ٹیکنالوجی کی دنیا سے وابستہ ارب پتی ایرک شمٹ نے 1969 میں بنائی گئی یہ حویلی 1990 میں تقریباً 2 ملین ڈالر میں خریدی تھی۔

اس حویلی میں ایک آؤٹ ڈور فائر پلیس، ایمپیتھیٹر، سوئمنگ پول اور ایک مصنوعی آبشار بھی موجود ہے۔

اس میں قدرتی روشنی کی رسائی کا مناسب انتظام موجود ہے، 5 بیڈ رومز پر مشتمل 5,265 مربع فٹ پر پھیلی اس حویلی میں 8 باتھ رومز، لیونگ رومز، فیملی رومز ہیں، 3 ایکڑ پر پھیلے گراؤنڈز بھی اس حویلی کا حصہ ہیں جو کسی پارک کی طرح دکھتے ہیں۔

لکڑی کے شیلف اور سیاہ و سفید فرشی ٹائلوں سے مزین ایک گرین ہاؤس بھی حویلی میں موجود ہے جہاں کئی قسم کے پودے رکھے گئے ہیں۔

اس حویلی کو یورپی اسٹائل میں ڈیزائن کیا گیا ہے جس میں گہرے رنک کی لکڑی سے بنا فرنیچر اور فرش موجود ہے۔

کیلیفورنیا میں یہ ایرک شمٹ کی واحد پراپرٹی نہیں ہے جبکہ کیلیفورنیا کے علاوہ اُن کی زیرملکیت پراپرٹی نیو یارک اور ننٹکٹ میں بھی ہے۔